San-Frantsısko Coca-Cola jáne basqa da azyq-túlik kompanııalaryn sotqa berdi
ASTANA. KAZINFORM — San-Frantsısko ýltra óńdelgen taǵamdar men sýsyndarǵa baılanysty tamaq óndirýshilerine qarsy sotqa shaǵym túsirdi. Sheneýnikterdiń aıtýynsha, olar amerıkalyqtardyń densaýlyǵyna zııan keltiredi, dep habarlaıdy New York Post.
San-Frantsısko shaǵymynda qaıta óńdeý deńgeıi joǵary ónimderimen eń tanymal 10 tamaq óndirýshi — Kraft Heinz Company, Mondelez International, Post Holdings, The Coca-Cola Company, PepsiCo, General Mills, Nestle USA, Kellogg, Mars Incorporated jáne Conagra Brands óz ónimderiniń adamdardy aýrýǵa shaldyqtyratynyn bilgenimen, paıdany barynsha arttyrý úshin táýeldilik týdyratyn ónimderdi satýdy jalǵastyrǵan.
Qala prokýrory Devıd Chıýdyń aıtýynsha, kompanııalar tutynýshylarda táýeldilik týdyratyn ónimderdi ázirleý jáne satý úshin temeki ónerkásibinde qoldanylatyn taktıkany qoldanǵan. Talap-aryzda kompanııalar qoǵamdyq tártipti buzý jáne adal emes marketıng júrgizý arqyly Kalıfornııa zańdaryn buzdy dep aıyptalady.
— Bul kompanııalar qoǵamdyq densaýlyq saqtaý salasynda daǵdarys týdyrdy, úlken paıda tapty, endi olarǵa keltirgen zııan úshin jaýapkershilikti óz moınyna alýǵa týra keledi, — dedi Chıý.
Shaǵymda ýltra óńdelgen taǵamdardyń taralýynan semizdik, qaterli isik jáne qant dıabeti kórsetkishteriniń artqany aıtylǵan.
Chıý keńsesiniń málimetinshe, ýltraóńdelgen ónimderge baılanysty júrek-qantamyrlary aýrýlary men dıabet San-Frantsıskodaǵy ólim-jitimniń negizgi sebepteriniń biri bolyp otyr. Bul aýrýlar kóbinese azshylyq toptar men áleýmettik jaǵdaıy tómen turǵyndar arasynda jıi anyqtalady.
— Qazir ýltra óńdelgen taǵamdardyń kelisilgen ǵylymı anyqtamasy joq jáne taǵamdardy tek óńdelgendikten zııandy dep jikteý nemese taǵamdardyń tolyq qorektik quramyn elemeý arqyly olardy jamandaý tutynýshylardy adastyrady jáne densaýlyqqa qatysty teńsizdikti kúsheıtedi, — dep málimdedi kóptegen kompanııalardyń múddesin qorǵaıtyn saýda toby — Tutynýshylar brendteri qaýymdastyǵynyń ónim saıasaty jónindegi aǵa vıtse-prezıdenti Sara Gallo.
Qala densaýlyq saqtaý shyǵyndaryn óteý úshin ótemaqy tóleýdi jáne azamattyq aıyppuldardy óndirip alýdy, sondaı-aq kompanııalarǵa aldamshy marketıngpen aınalysýǵa tyıym salýdy jáne olardan óz tájirıbelerin ózgertýdi talap etip otyr.
Ýltra óńdelgen taǵamdardyń anyqtamasy áli de pikirtalas taqyryby bolyp qala berse de, zertteýshiler ony tehnologııalyq protsesterdi, qospalardy jáne ónerkásiptik ıngredıentterdi paıdalanyp jasalǵan jáne ádette az mólsherde tutas taǵamdardy qamtıtyn kóptegen qaptalǵan taǵamdarǵa, táttilerge jáne alkogolsiz sýsyndarǵa qoldanyp keledi.
AQSh Densaýlyq saqtaý mınıstri Kishi Robert F. Kennedıdiń mamyr aıynda jarııalaǵan esebinde Tramp ákimshiligi ýltra óńdelgen taǵamdardy balalar arasyndaǵy sozylmaly aýrýlardyń eldegi epıdemııasynyń sebepteriniń biri retinde atady.
Buǵan deıin Tramp Coca-Cola-ny AQSh-taǵy sýsyn quramyn ózgertýge kóndirgenin jazǵan bolatynbyz.