San-Dıego meshitindegi atys: úsh turǵyn men eki kúdikti mert boldy
ASTANA. KAZINFORM — San-Dıegodaǵy meshitte eki jasóspirim turǵyndarǵa oq jaýdyryp, úsh adam qaıtys boldy. Kúdiktiler keıin oqıǵa bolǵan jerden birneshe kvartal qashyqta óli kúıinde tabyldy, dep habarlaıdy Associated Press.
Qala polıtsııasynyń bastyǵy Skott Ýoldyń aıtýynsha, oqıǵa jek kórý nıetimen jasalǵan qylmys retinde baǵalandy.
Atys San-Dıego Islam ortalyǵynda boldy — bul okrýgtiń eń iri meshiti, qalanyń ortalyǵynan shamamen 14 shaqyrym soltústikke ornalasqan. Ortalyq aýmaǵynda Al-Rashıd mektebi de bar, onda bes jastan bastap balalar arab tilin, ıslamtanýdy jáne Qurandy úırenedi. Mekteptegi balalar zardap shekken joq.
Qaza tapqandardyń arasynda meshit kúzetshisi bar. Polıtsııa bastyǵynyń sózinshe, kúzetshi bul tragedııanyń aldyn alǵan. Qazir taǵy eki qurbannyń kim ekeni anyqtalyp jatyr. Bir adam jaraqattanyp aýrýhanaǵa jetkizildi — biraq oǵan oq tımegen.
Eki kúdikti de jasóspirim bolýy múmkin, olar oqıǵa ornynan birneshe kvartal qashyqtyqta jolda turǵan avtokólikten tabyldy. Іzdestirý jumystary barysynda olardyń jergilikti turǵynǵa oq atqany, biraq ol adamnyń zardap shekpegeni anyqtaldy.
Baspasóz máslıhatynda Islam ortalyǵynyń dırektory ımam Taha Hasan meshitke jasalǵan shabýyldy «qasiretti» dep atap, ortalyqtyń dinaralyq dıalogty belsendi túrde nasıhattap jatqanyn jetkizdi. Ol qaıǵyly oqıǵa bolǵan kúni bir top adamnyń ıslam dinin bilý úshin meshitke kelgenin aıtty.
Amerıkalyq-ıslamdyq azamattyq quqyq uıymdary oqıǵany qatań aıyptady.
— Namaz oqý, qulshylyq jasaý kezinde eshkim óz qaýipsizdigi úshin qoryqpaýy kerek, — dedi Amerıka-Islam qatynastary keńesiniń ókili Tadjın Nızam.
Kalıfornııa gýbernatory Gevın Nıýsom oqıǵa týraly dereý habardar etildi. Tergeý jalǵasyp jatyr.
Aıta keteıik, Brazılııada jasóspirim mektepte oq jaýdyryp, eki qyzmetker mert boldy.
