Sán álemin moıyndatqan jigit Ulttyq ulanda qyzmet etip júr
ASTANA. KAZINFORM — Bir kezderi álemniń sán podıýmdarynda júrip, áıgili brendterdiń kıimderin kópshilikke tanystyrǵan Shyńǵys Tańatpaev búginde áskerı forma kıip, Ulttyq ulan qatarynda Otan aldyndaǵy boryshyn ótep júr.
QR ІІM Ulttyq ulanynyń baspasóz qyzmeti habarlaǵandaı, Qaraǵandydaǵy 5451 áskerı bóliminiń qatardaǵy jaýyngeri Shyńǵys Tańatpaev modeldik mansabyn 17 jasynda bastaǵan. Boıy men kelisti kelbeti ony sán ındýstrııasyna jetelep, halyqaralyq podıýmdarǵa shyǵarǵan. Ol Frantsııanyń áıgili Pierre Cardin sán úıiniń, Italııanyń Federico Barrazzo jáne Sauvage Multi brendteriniń kıimderin kórsetip, álemniń túrli elderin sharlaǵan.
Al búginde ol áskerge kelip, podıýmdaǵy nyq qadam saptaǵy áskerı júriske aýysqan. Bir qaraǵanda, modeldik óner men áskerı qyzmettiń arasy jer men kókteı kórinýi múmkin. Alaıda ekeýine de ortaq dúnıe bar. Ol — tártip pen jınaqylyq. Podıýmda ózin erkin ári senimdi ustaı bilý qajet bolsa, áskerı qyzmette de ár qımylǵa jaýapkershilikpen qarap, berilgen tapsyrmany dál oryndaý mańyzdy.
Sarbaz qazirgi ýaqytta Qaraǵandy qalasynyń qoǵamdyq qaýipsizdigin saqtaýǵa óz úlesin qosyp júr. Kún saıyn áskerı mindetin abyroımen atqaryp, buqaralyq is-sharalar kezinde jáne adam kóp shoǵyrlanǵan oryndarda qoǵamdyq tártiptiń saqtalýyn qadaǵalaıdy.
Qyzmet barysynda turǵyndarmen tikeleı baılanysyp, túrli jaǵdaılarda kómek kórsetýge de atsalysady. Ata-anasynan adasyp qalǵan balalardy taýyp, olardy jaqyndaryna tabystaýǵa, sondaı-aq turǵyndardyń joǵalǵan baǵaly zattaryn qaıtarýǵa kómektesken kezderi bar.
Aıta keteıik, búginde 7 myńnan astam ulandyq kún saıyn eldiń 21 qalasynda qoǵamdyq tártipti kúzetý qyzmetin atqarady. Al shahterler qalasynda bul qyzmetti oryndaýǵa kúnine 250-den astam sarbaz jumyldyrylady.
Budan buryn Ulttyq ulanda jeti tilde erkin sóıleıtin polıglot sarbaz áskerı mindetin atqaryp júrgenin jazdyq.
