«Samuryq-Qazynanyń» merdiger uıymdarynda eńbek qaýipsizdigi saqtalmaıdy – mınıstrlik

ASTANA. QazAqparat – Eńbek jáne áleýmettik qorǵaý komıtetiniń tóraǵasy – QR Bas memlekettik eńbek ınspektory Tólegen Ospanqulov «Samuryq-Qazynanyń» tapsyrysyn oryndaýshy merdiger uıymdar eńbek qaýipsizdigin saqtamaıtynyn problema etip kóterdi, dep habarlaıdy QazAqparat tilshisi.

«Samuryq-Qazyna» kompanııalar tobynda eńbek qaýipsizdigi jóninde jumys shynymen júrgizilip jatyr. Biraq bul jumys onyń merdiger uıymdarynda júrgizilmeıdi. Mysaly men eldiń bas eńbek ınspektory retinde jumys babymen «QazAtomÓnerkásipten» basqa salalardyń bárin aralap shyqtym. Ondaǵy ahýaldy óz kózimmen kórdim deýge bolady. 2020 jyly biz Eńbek kodeksine vertıkaldy baqylaý týraly normany jaıdan-jaı engizgen joqpyz. Biraq ol normanyń tek qurylys alańdaryna ǵana qatysy bar. Al «Samuryq-Qazyna» óziniń ishki qujattarymen ózine tıesili kásiporyndardaǵy jaǵdaıdy ishki baqylaý arqyly retteıdi. Degenmen bul norma qazirgi tańda sonshalyqty jaqsy jumys istep jatqan joq. Sonyń saldarynan byltyr birneshe qaıǵyly oqıǵa boldy», - dedi ol.

Vedomstvo ókili merdiger uıymdarmen kelisimshart bir jylǵa ǵana jasalatynyn eske saldy.

«Biz merdiger uıymdarmen kelisimshart bir jylǵa ǵana jasalatynyn bilemiz. Bul jumys berýshige eńbek qaýipsizdigine aqsha salýǵa múmkindik bermeıdi. Myna jerde eńbek qaýipsizdigine 1 paıyz ǵana qarajat bólý az ba, kóp pe degen saýal qoıyp jatyrsyzdar. Onyń ózi «Samuryq-Qazyna» kompanııalar tobyndaǵy kásiporynda ǵana saqtalady. Al merdiger uıymdarda osy 1 paıyz da bólinbeıdi. Óıtkeni olarǵa tenderge qatysý úshin dempıng jasaý kerek, aılyqty kóbeıtý kerek. Sondyqtan merdiger uıymdarda tehnıka jańartylmaıdy. Búgingi tańda «Samuryq-Qazyna» kompanııalar tobynda kelisimshartty kem degende 3 jylǵa bekitý máselesi qaralyp jatqanyn bilem. Eger osy jumysty aıaǵyna jetkizse, tek qana kompanııalar tobynda emes, merdiger uıymdarda da óndiristik jaraqat azaıar edi dep oılaımyn», - dedi Tólegen Ospanqulov.