«Samuryq-Qazynanyń» basshysy ótken jyldyń basty jetistikterin atady
Qor basshysynyń aıtýynsha, qorǵa kiretin kompanııalardy jekeshelendirý naýqany aıasynda 230 mıllıard teńgeniń tabysy tústi.
"Ótken jyldyń basty jetistigi - Qazatomóndiristiń xalyqaralyq IPO-ǵa shyǵýy. Odan 451 mıllıon AQSh dollar tústi. Ol aqsha Ulttyq qorǵa aýdaryldy. Sosyn mańyzdy jobalardy da atap ótken jón. Sonyń ishinde Memleket basshysynyń bes áleýmettik bastamasy aıasynda qolǵa alynǵan "Saryarqa" gaz qubyrynyń qurylysy bar. Atalǵan joba boıynsha 1,7 mıllıon adam turatyn 170 eldi mekenge gaz tartylady. Budan bólek, Kcell-ge tıesili aktsııalardyń 75 protsentin satyp aldyq. Osy kelisim jaıynda ashyq jarııalaǵannan keıin Qazaqtelekomnyń aktsııalary 10-15 protsentke qymbattady. Byltyr barlyq munaı-gaz óńdeý zaýyttaryn jańǵyrtý jumystary aıaqtaldy. Sóıtip, ishki naryǵymyzdy sapaly munaı ónimderimen qamtamasyz ettik", - dedi A.Esimov qordyń búgingi keńesinde.
Onyń sózine qaraǵanda, mańyzdy jobalarǵa iri ınvestorlar tartyldy. Qor aıasyndaǵy satyp alýlar júıesi jańartyldy. Al Memleket basshysynyń tapsyrmasy boıynsha xoldıng ishindegi satyp alýlar qysqartyldy. Sonyń arqasynda bıznesmenderge 309 mıllıard teńgeden astam tapsyrys berildi.
"Budan bólek, ótken jyly biz qordyń 2028 jylǵa deıingi strategııasyn ázirledik. Atalǵan qujatty Memleket basshysynyń tóraǵalyq etetin keńes bekitti. Bul - bizdiń basty baǵdarlamamyz. Sol boıynsha on jyl boıy jumys isteıtin bolamyz", - dep atap kórsetti A.Esimov.
Aıta keteıik, Axmetjan Esimov "Samuryq-Qazynanyń" tabysyn jarııalady. Qordyń negizgi qyzmetinen túsetin tabys 31 prrtsentke ósti. Al debıtorlyq qaryzdyń kólemi 80 protsentke azaıdy.
