«Samuryq-Qazyna» Jyljymaıtyn múlik qorynyń qorjynyndaǵy 50 jobanyń 28-i maquldandy
ASTANA. Qazannyń 28-i. QazAqparat /Rýslan Ǵabbasov/ - «Samuryq-Qazyna» Jyljymaıtyn múlik qorynyń qorjynyndaǵy 50 jobanyń 28-i maquldanyp, qalǵandary búginde qaralýda.
Bul týraly búgin Astanada «Samuryq-Qazyna» UÁQ quramyndaǵy enshiles kompanııalardaǵy partııalyq uıymdardyń birinshi basshylarynyń otyrysynda «Samuryq-Qazyna» Jyljymaıtyn múlik qorynyń basqarma tóraǵasy Ǵosman Ámrın málim etti, dep habarlaıdy QazAqparat.
Onyń aıtýynsha, 50 joba boıynsha ınvenstıtsııanyń jalpy kólemi 170 mıllıard teńgeden astam qarjyny quraıdy, al maquldanǵan 28 jobadaǵy ınvestıtsııa 111 mıllıard teńgege jetti. Bul baǵdarlamany júzege asyrý nátıjesinde 8 myńnan astam úleskerdiń máselesi sheshilmek. Sondaı-aq ár qaladaǵy halyqty turǵyn úımen qamtamasyz etý úshin naryqqa 11 myńnan astam páter usynylmaq.
Ǵ. Ámrınniń sózine qaraǵanda, satyp alynatyn turǵyn úı aýdany 1 mıllıon 300 myń sharshy metrdi quraıdy. Bir sharshy metrdiń ortasha quny 113 myń teńge somasynda baǵalanyp otyr.
