«Samuryq-Qazyna» Jyljymaıtyn múlik qory QR Prezıdentine iskerlik qurylysty qoldaýda atqaryp jatqan sharalary týraly esep berdi

«Biz Memleket basshysyna Astana jáne Almaty qalalaryndaǵy úleskerlerdiń máselelerin sheshý boıynsha aǵymdaǵy kezeńde bizdiń qorymyz atqarǵan jumystardyń aralyq qorytyndylary týraly, 2010, 2011 jyldary qandaı nysandar paıdalanýǵa beriletindigi týraly aqparat berdik. Jalpy jyljymaıtyn múlik salasyn turaqtandyrý boıynsha aldymyzǵa qoıylǵan mindet oryndalyp keledi», - dedi jýrnalısterge juma, qyrkúıektiń 3-i kúni «Samuryq-Qazyna» Jyljymaıtyn múlik qory» AQ basqarmasynyń tóraǵasy Ǵosman Ámirın.

Kompanııanyń baspasóz qyzmeti habarlaǵandaı, bıylǵy jylǵy tamyzdyń 1-i kúni Jyljymaıtyn múlik qory jalpy somasy 90,47 mlrd. teńgeni quraıtyn qurylysy aıaqtalmaǵan 27 nysandy qarjylandyrý týraly kelisimge qol qoıǵan. Onyń ishinde 24 nysan Astana qalasynda (69,67 mlrd. teńge), eki nysan - Almatyda (4,75 mlrd. teńge) jáne bir nysan Almaty oblysynda (16,05 mlrd. teńge) ornalasqan.

Jyl basynda eki nysan paıdalanýǵa berildi, olar - «Ál-Arqa» turǵyn úı kesheni (153 páter) men «Aqjaıyq» turǵyn úı kesheni (96 páter). Jyl sońyna deıin 8 nysan men bir kezekte 4 nysan paıdalanýǵa berilýge daıyndalyp jatyr, sol arqyly 1502 úleskerdiń máselesin sheship, 111,8 myń sharshy metr turǵyndyq aýmaq pen 13,3 myń sharshy metr kommertsııalyq aýmaqtardy satyp alý josparlanyp otyr. Jalpy somasy 43,8 mlrd. teńge bolatyn taǵy 8 nysandy qarjylandyrý máselesi qazir ártúrli deńgeıde qaralyp jatyr.