«Samuryq-Qazyna» jyljymaıtyn múlik qory 2020 jylǵa deıin 800 myń sharshy metrden astam baspana salady

ASTANA. QazAqparat - 2016 jyldyń birinshi jarty jyldyǵynda «Samuryq-Qazyna» jyljymaıtyn múlik qory» AQ «Nurly jol» baǵdarlamasynyń memlekettik operatory bolyp belgilengen. Osy baǵdarlama aıasynda kommertsııalyq baspana qurylysy úshin Qorǵa 97 mlrd. teńge bólingen.

Atalǵan qarajat azamattardyń talabyna jáne jyljymaıtyn múlik naryǵyndaǵy talapqa ıe bolǵan, qurylys jobalaryn qarjylandyrý arqyly qurylys salýshylaryn qoldaýǵa baǵyttalatyny josparlanyp otyr. Bul týraly atalǵan qordyń baspasóz qyzmetinen habarlady.

«Samuryq - Qazyna» jyljymaıtyn múlik qory» AQ basqarma tóraǵasy Baýyrjan Mamytálıev atap ótkendeı, «2020 jylǵa deıingi merzimde «Nurly jol» baǵdarlamasy boıynsha barlyǵy 800 000 sharshy metrden astam kommertsııalyq baspana qurylysyn salý josparlanýda».

Atalǵan baǵdarlamanyń basqa baǵdarlamalardan aıyrmashylyǵy - negizgi talaptarǵa qosylyp otyrǵan qurylys salýshylardy qoldaýdyń mynadaı jańa tetikteri:

1. Qurylys nysandaryn qarjylandyrýda 80  paıyzdan aspaıtyn qarjy «Samuryq - Qazyna» jyljymaıtyn múlik qory» AQ-ynan, al 20 paıyzdan kem emes kólemi qurylys salýshydan bólinedi.

2. Qurylys salýshyǵa erkin naryqta qurylysty bastaǵan sátten 24 aıdan aspaıtyn merzimde páterlerdi satý quqyǵy beriledi.

3. Baspananyń satylmaǵan pýly 20 paıyzdyq dıskontpen «Samuryq - Qazyna» jyljymaıtyn múlik qory» AQ-qa qaıtarylatyn bolady.

«Búgingi kúni qorǵa qurylys salýshylardan ótinimder túsýde. Ótinimderdiń qarastyrylýyn qordyń arnaıy komıssııasy júrgizedi. Qarjylyq, tehnıkalyq, zańdylyq jáne marketıngtik taldaýlardy paıdalaný arqyly qurylys nysandaryna muqııat tańdaý júrgizilýde. Bul ádis qurylys salýshylarynyń aqshalaı qarajatynyń jyldam qaıtarylýyn qamtamasyz etedi. Qarajat qorda jınaqtalyp, jańa jobalardy qoldaýǵa baǵyttalatyn bolady», - dedi B.Mamytálıev.