«Samuryq-Qazyna» jalpy somasy 104 mlrd. teńgege úlestik qatysýdaǵy 25 nysandy qarjylandyrýdy mindetine alady

Bul týraly búgin Astana qalasy ákimdiginde ótken elordadaǵy úlestik qurylys nysandaryn 2010 jyldyń sońyna deıin aıaqtaýǵa arnalǵan keńeste «Samuryq-Qazyna» Ulttyq ál-aýqat qorynyń basqarma tóraǵasy Qaırat Kelimbetov málim etti, dep habarlaıdy QazAqparat.

Q. Kelimbetovtiń atap kórsetkenindeı, 2009 jyly jyljymaıtyn múlik qory jalpy somasy 93 mlrd. teńgege qurylysy aıaqtalmaǵan 22 nysandy qarjylandyrýǵa mindetteme alǵan. Onyń 75,5 mlrd. teńgesi Astanadaǵy 20 nysanǵa baǵyttalǵan. «Jyljymaıtyn múlik qory qolǵa alǵan sharalardyń nátıjesinde 3 myń úleskerdiń problemasy sheshiledi. Búginde qol qoıylǵan kelisimder boıynsha jalpy somasy 30 mlrd. teńgege qarjylandyrý júzege asyryldy. Merdigerlermen onyń 12 mln-ǵa jýyǵy ıgerildi. Jyljymaıtyn múlik qory, sondaı-aq qurylysshylarǵa «Samuryq-Qazyna» qory arqyly bólingen qarjylyq kómekke monıtorıng júrgizedi. Qarjylyq kómek sheńberinde merdiger kompanııalarǵa 12 nysan boıynsha barlyǵy 5,1 mlrd. teńge bólindi. Búginde ıgerilgeni - 5 mlrd. teńge», dedi Q. Kelimbetov.

Q. Kelimbetovtiń aıtýynsha, 2009 jyly Jyljymaıtyn múlik qory qarjylandyryp jatqan nysandardyń ekeýi, ıaǵnı 78 úleskerdiń qatysýyndaǵy «Aqjaıyq» jáne «Ál-Arqa» turǵyn úı keshenderiniń qurylysy aıaqtaldy. Olarda 377 páter Jyljymaıtyn múlik qorymen satyp alyndy. Al 2010 jyly JMQ jalpy somasy 104 mlrd. teńgege 25 nysandy qarjylandyrýdy mindetine almaq. Onyń ishinde 64 mlrd. teńgesi Astanadaǵy 16 nysanǵa baǵyttalady. Osylaısha, JMQ-nyń Astana qalasy boıynsha mindetteme portfeli 140 mlrd. teńgeni quramaq.