Samuryq-Qazyna jalǵyz aktsıoneri – Úkimetke 302 mlrd teńge dıvıdend tóledi

ASTANA. QazAqparat – «Samuryq-Qazyna» jalǵyz aktsıoneri – Úkimetke 302 mlrd teńge dıvıdend tóledi. Bul týraly atalǵan qordyń ekonomıka jáne qarjy jónindegi dırektory Nazıra Nurbaeva málim etti, dep habarlaıdy QazAqparat tilshisi.

«Qordyń dıvıdend saıasatyna sáıkes, Úkimettiń tapsyrmasy boıynsha qordyń áleýmettik jobalardy qarjylandyrý kólemin esepke alǵandaǵy jyl saıynǵy dıvıdend mólsheri qordyń júıe quraýshy kompanııalardan alatyn dıvıdendteriniń 50 paıyzyna teń. 2022 jyly dıvıdend saıasatynyń oryndalýy - 124 paıyz, ıaǵnı tıesili 245 mlrd teńgeniń oryna aktsıonerge tólengen jalpy soma 302 mlrd teńge bolyp otyr», - dedi ol qorda ótken baspasóz máslıhatynda.

Onyń atap ótýinshe, 2021 jyly dıvıdend saıasatynyń jańa ádisteri qabyldanǵan sátten beri jalǵyz aktsıonerdiń paıdasyna aýdarylǵan tólem mólsheri 2 esege artty.

«Jalǵyz aktsıonerge tólengen 302 mlrd teńgeden bólek, qor toby iri salyq tóleýshi sanalady. 2022 jyldyń nátıjesinde tólengen salyq somasy - 1,7 trln teńge. Bul - 2021 jylǵy kórsetkishten 529 mlrd teńgege artyq», - dedi Nazıra Nurbaeva.