«Samuryq-Qazyna» Ulttyq ál-aýqat qory» AQ basqarmasynyń sheshimimen birqatar taǵaıyndaýlar jasaldy
ASTANA. Jeltoqsannyń 14-i. QazAqparat - «Taý-Ken-Samuryq» AQ Basqarma Tóraǵasy jáne Dırektorlar Keńesiniń múshesi Murat Murtazaevtyń ókilettigi toqtatylýy sebepti «Samuryq-Qazyna» AQ Basqarmasynyń sheshimimen «Taý-Ken-Samuryq» AQ Basqarma Tóraǵasy jáne Dırektorlar Keńesiniń múshesi bolyp Bolat Amanjoluly Svıatov taǵaıyndaldy.
Bul týraly qordyń baspasóz qyzmetinen habarlady.
B.A Svıatov 1958 jyly týylǵan. S.M.Kırov atyndaǵy Qazaq Memlekettik ýnıversıtetiniń hımııa fakýltetin «ınjener-hımık» mamandyǵy boıynsha, QazSSR ǴA metallýrgııa jáne ken baıytý Instıtýty aspırantýrasynyń kúndizgi bólimin «túrli-tústi jáne sırek metaldar metallýrgııasy» mamandyǵy boıynsha, RF Úkimeti janyndaǵy halyq sharýashylyǵy akademııasyn (Qarjy menedjment Joǵarǵy mektebi) «qarjy menedjmenti» mamandyǵy boıynsha bitirgen. Tehnıka ǵylymdarynyń doktory, menedjment magıstry.
Qazaqstannyń taý-ken salasyndaǵy iri óndiris kásiporyndarynda basshy bolyp qyzmet atqarǵan: Pavlodar allıýmınıı zaýytynyń kommeratsııalyq dırektory, Aqsý ferroqorytý zaýytynyń dırektory, «Qazhrom» transulttyq kompanııasynyń bas dırektory, Taraz metallýrgııalyq kompanııasynyń bas dırektory, Dırektorlar Keńesiniń Tóraǵasy bolyp qyzmet atqarǵan.
Sonymen qatar, «Samuryq-Qazyna» AQ Basqarmasy Malaı Mýkherdjıdiń «Taý-Ken Samuryq» kompanııasy Dırektorlar Keńesi Tóraǵasynan ketý jónindegi jeke ótinishin qanaǵattandyrdy. «Samuryq-Qazyna» AQ Basqarmasynyń usynysy boıynsha, «Taý-Ken Samuryq» kompanııasy Dırektorlar Keńesini Tóraǵasy bolyp «Samuryq-Qazyna» UÁQ Basqarýshy dırektory, taý-ken aktıvteri blogyn qadaǵalaýshy Ulan Saparuly Baıjanov saılandy.
Sondaı-aq «Taý-Ken Samuryq» kompanııasy Dırektorlar Keńesi quramyna táýelsiz dırektor bolyp, tehnıka ǵylymdarynyń doktory, professor, QR Memlekettik syılyǵynyń laýreaty, Hımııa-metallýrgııa ınstıtýtynyń dırektory M.J. Tolymbekov saılandy.
