«Samuryq-Qazyna» UÁQ jeke keńesshiler tartýǵa qatysty túsinikteme berdi
«Qordyń jáne qordyń kompanııalar tobynyń keńesshilerdi óte jıi shaqyrady degen synyn jıi estımiz. Biraq, munyń kez kelgen kommertsııalyq kompanııa úshin ádettegi tájirıbe ekendigin atap ótkim keledi. Bul rette qor da, qordyń kompanııalar toby da transformatsııa baǵdarlamasyn júzege asyrýdyń qarqyndy kezeńinde tur. Biz saraptamalar joq salalarǵa keńesshiler tartamyz», - dedi Ortalyq kommýnıkatsııalar qyzmetindegi brıfıngte Qordyń qarjy jáne operatsııalar jónindegi ýaqytsha basqarýshy dırektory Ernar Janádil.
Onyń aıtýynsha, keńesshiler shaqyrylmastan buryn atalǵan konsýltatsııalyq qyzmettiń qaıtarymy, tıimdiligi qandaı bolmaq degen máseleler baǵalanatyn bolady.
«Qorda jeke jumys toby, komıssııa bar. Olar barlyǵynyń tolyqtaı zerdelep, qandaı da bir oń qaıtarym bolatyndyǵyn dáleldegennen keıin ǵana biz atalǵan konsýltatsııalyq qyzmetterdi bıýdjetke engizip, satyp alatyn bolamyz», - dedi Janádil.
Sonymen qatar ol bul másele qor tóraǵasynyń únemi baqylaýynda turatyndyǵyn da basa aıtty.
«Bizdi únemi tekseredi, bólingen qarjynyń, ıaǵnı konsýltatsııalyq qyzmetterge ketken qarjynyń qaıda jáne qalaı jumsalǵanyn tekseretin ishki aýdıt qyzmeti de bar. Tipti taıaýda Esep komıteti tekserip ketti. Olardyń eskertpeleri ár ýaqytta da eskeriledi», - dedi ol.
Onyń sózine qaraǵanda, konsýltatsııalyq qyzmetterge ketetin shyǵyndardyń kólemi jalpy ákimshilik shyǵystardyń 7-8 paıyzyn quraıdy.
«Biraq munyń az ekendigin aıta alamyn. 2016 jyly eger 2015 jylmen salystyrǵanda shamamen 45 paıyzǵa deıin tómendetildi. Biz shyǵystar ósimin ustap turýǵa nemese ońtaılandyrýǵa tyrysamyz», - dedi basqarýshy dırektor.
Aıta keteıik, 2016 jylǵy qordyń jalpy ákimshilik shyǵystary 345 mlrd. teńgeni quraǵan bolatyn.
