«Samuryq-Qazyna» UÁQ qyzmetiniń maqsaty men mindetin qaıta qaraý kerek - M. Nárikbaev
ASTANA. Aqpannyń 19-y. QazAqparat /Qanat Mámetqazyuly/ - «Samuryq-Qazyna» UÁQ qyzmetiniń maqsaty men mindetterin qaıta qaraý kerek.
Búgin QR Parlamenti Májilisi janyndaǵy Qoǵamdyq palatanyń otyrysynda «Quqyq qorǵaý júıesin reformalaý jáne onyń odan ári izgilenýi» taqyrybynda baıandama jasaǵan Palata tóraǵasynyń orynbasary Maqsut Nárikbaev osylaı málim etti, dep habarlaıdy QazAqparat.
«Ulttyq ál -aýqat qorynyń jáne onyń kóptegen damý ınstıtýttarynyń qyzmetin ásirese, olardyń qyzmetterin baǵalaý ólshemderi boıynsha qaıta qarastyrý qajet. Jalpy, damý ınstıtýttary tabys ákelýde qaǵıdatty túrde kommertsııalyq bankterge qaraǵanda úlken aıyrmashalyqpen áreket etýleri tıis. Óıtkeni, damý ınstıtýttarynyń maqsaty basqa. Olardyń maqsaty - naqty sektordyń damýyna járdemdesý. Ondaı ınstıtýttar áreketteriniń nátıjeliligi dál osy pozıtsııa boıynsha baǵalanýy tıis», dedi M. Nárikbaev. Onyń aıtýynsha, bundaı qadamdardy júzege asyrý ekinshi deńgeıdegi bankterdiń jyldyq paıyzdyq stavkalaryn 7-8 paıyzǵa deıin tómendetýge, naqty sektorlar úshin kredıtterdi qoljetimdi etýge septigin tıgizetin edi. «Olaı bolmaǵan jaǵdaıda, arnaıy mamandandyrylǵan ınvestıtsııalyq bank qurý qajettiligin qaraýǵa týra keledi. Sol bank ınvestıtsııalyq jobalardy naqty stavkalar boıynsha qarjylandyrsyn. Bunymen birge, ulttyq qor jobalarynda zeınetkerlerdi qoldaý tetikteri qamtylýy, bilim men densaýlyq salalaryn ınvestıtsııalaý, adamı kapıtaldy qalyptastyrý sharalary kózdelgeni jón», dedi M. Nárikbaev.
