«Samuryq-Qazyna» taǵylymdamasynan ótken jas mamandar iri kompanııalarda jumys isteıdi

ASTANA. QazAqparat - «Samuryq-Qazyna» ulttyq qorynda jas IT-mamandarǵa arnalǵan «Tsıfrlyq jaz-2018» taǵylymdama baǵdarlamasynyń qorytyndysy jarııalandy, dep habarlaıdy QazAqparat tilshisi. 

Ulttyq qordyń biregeı jobasyna el boıynsha barlyǵy 2100 úmitker ótinim berip, sonyń ishinen 65 jas IT-maman iriktep alyndy. Olardyń arasynan úzdik dep tanylǵan 33 taǵylymdamashy Qazaqstannyń eń iri kompanııalaryna jumysqa ornalasady.

«Osydan eki aı buryn biz osy jobany bastap, jas mamandarǵa IT salasynda, eń aldymen, tájirıbe jınaýǵa múmkindik berdik. Sizder kásibı mamandarmen birge kúrdeli modýlderdi qurastyryp, «Microsoft», «Oracle» jáne «Cisco» sııaqty IT salasyndaǵy úzdik kompanııalardyń oqytý baǵdarlamalaryna qatystyńyzdar. Biz keleshegi zor, daryndy mamandardy daıyndadyq dep aıta alamyz»,-dedi «Samuryq-Qazyna» AQ Operatsııalyq qyzmet jónindegi basqarýshy dırektory Álisher Pirmetov. 

Tańdap alynǵan IT mamandar taǵylymdama baǵdarlamasy aıasynda ulttyq qordyń elektrondy qujat aınalymyna kóshý jobasyn daıyndaýǵa qatysyp, serverlerde qyzmet kórsetti, odan bólek telegram-bot úshin Java tilinde jańa buıryqtardy qurastyrý sekildi tapsyrmalardy oryndady. 

«Atalǵan joba týraly áleýmettik jeli arqyly bildim. Іrikteýdiń barlyq kezeńinen súrinbeı ótip, «Qazatomónerkásip» ulttyq atom kompanııasynda taǵylymdamadan ótý baqyty buıyrdy. 2 aı kóleminde JOO-nan alǵan bilimimdi odan ári jetildirdim. Sonyń nátıjesinde «Qazatomónerkásiptiń» Aqparattyq tehnologııalar departamentine jobalardy basqarý menedjeri qyzmetine qabyldandym. Eńbek jolymnyń osyndaı úlken kompanııadan bastalatynyna qýanyshtymyn, men úshin bul jetistiktiń bir satysy», - deıdi taǵylymdama jeńimpazy, Astana qalasyndaǵy qazaq ekonomıkalyq, qarjy jáne halyqaralyq saýda ýnıversıtetiniń túlegi Elvıra Meıramova. 

«Tsıfrlyq Qazaqstan» keshendi baǵdarlamasy aıasynda júzege asyrylǵan taǵylymdamadan Astana, Almaty, Atyraý, Pavlodar jáne Óskemen qalalarynyń IT mamandary ótti. 

Aıta keteıik, aǵymdaǵy jyldyń sáýir aıynda «Samuryq-Qazyna» AQ basshylyǵy qordyń kadrlyq saıasatyn jańartyp, kópshilikke tanystyrǵan bolatyn. Osy turǵyda holdıngke qarasty kompanııalarda jumysqa qabyldanatyn kandıdattardy irikteýdiń ashyqtyǵyn qamtamasyz etetin konkýrstyq irikteýdiń biryńǵaı júıesi engizildi.