Samuryq-Qazyna satyp alý júıesindegi ózgerister kosmetıkalyq sıpatta bolyp shyqty - senator
Senator «Samuryq – Qazyna» qorynyń satyp alý rásimi týraly syn aıtty. Ol Úkimet basshysy Álıhan Smaıylovtyń atyna joldaǵan óziniń depýtattyq saýalynda salanyń negizgi máselelerine egjeı-tegjeıli toqtaldy.
Depýtat Prezıdenttiń tapsyrmasyn oryndaý maqsatynda «Samuryq-Qazyna» qorynda satyp alýdyń jańa tártibi ázirlengenin atap ótti. Alaıda, bıznes-qaýymdastyǵy men sarapshylar jańa erejelerge taldaý jasaı otyryp, Qor bir kózden satyp alý ádisinen aýytqymaǵanyn aıtyp otyr. Sarapshylardyń pikirinshe, jańa tártip ádil básekelestiktiń negizgi ustanymdaryn joqqa shyǵarady.
«Bıznes ókilderi elimiz Prezıdentiniń tapsyrmasynan keıin satyp alý salasynda jańa demokratııalyq qaǵıda sıpatynda sapaly ózgerister kútken bolatyn. Biraq sarapshylardyń syny men buqaralyq aqparat quraldaryn zerdeleı otyryp, jaqsy jaǵyna qaraı eshteńe ózgermegen degen qorytyndy jasaýǵa bolady. Qordyń satyp alý júıesine qatysty jarııa etken ózgerister kosmetıka men býtaforııa bolyp shyqty», - dedi E. Mamytbekov.
Senator 2022 jylǵy 1 sáýirde kúshine engen jańa erejelerde holdıngishilik kooperatsııa aıasynda satyp alý ádisi alynyp tastalǵanyn atap ótti. Alaıda, senatordyń aıtýynsha, ol jumystar men qyzmetter tizbesi keńeıtilip, bir kózden satyp alýǵa aýystyrylǵan bolyp shyqty.
«Kooperatsııanyń holdıngishilik satyp alýy 2021 jyly satyp alýdaǵy jalpy kólemniń 25%-yn qurady. Qordaǵy barlyq satyp alý kólemi 3,4 trln teńgeni quraǵan bolatyn. Bul rette satyp alý kóleminiń tek 18%-y ǵana ashyq tenderge shyǵaryldy. Al Qordyń portfeldik kompanııalarynyń 2020-2025 jyldarǵa arnalǵan jyldyq jáne uzaq merzimdi satyp alý jospary monıtorıng qorytyndylary boıynsha báseke pozıtsııadaǵy satyp alý holdıngishilik kooperatsııa arqyly da josparlanatyny belgili boldy. Árıne, sodan keıin básekelestik ortany keńeıtý men damytýdy kózdeıtin ózgerister qaıda degen suraq týyndaıdy»,- dedi depýtat óz saýalynda.
Senator Edil Mamytbekov osyǵan baılanysty Úkimet basshysy Álıhan Smaıylovtan osy jaǵdaıǵa nazar aýdarýdy surady. Óıtkeni Qordyń ádil básekelestik pen bıznestiń teńdigi qaǵıdattaryn buzatyn satyp alý normalary alynyp tastalmaǵan.