«Samuryq-Qazyna» «Qazaq Air» kompanııasyn jekeshelendirýdegi basty maqsatty atady

ASTANA. QazAqparat – «Samuryq-Qazyna» AQ damytý jáne jekeshelendirý jónindegi basqarýshy dırektory Saltanat Sátjan «Qazaq Air» kompanııasyn jekeshelendirýdegi basty maqsatty atady, dep habarlaıdy QazAqparat tilshisi.

«Samuryq-Qazyna» qor tobynyń aktıvterin jekeshelendirý protsesi ashyqtyǵyn barynsha qamtamasyz etýge tyrysady. Sondyqtan da «Qazaq Air» kompanııasyn jekeshelendirý máseleri boıynsha sizderdi qyzyqtyratyn saýaldarǵa jaýap berý úshin brıfıng ótkizip otyrmyz. Kompanııa Qazaqstan Úkimeti bekitken 2021-2025 jyldarǵa arnalan jekeshelendirý josparyna sáıkes jekeshelendiriledi. Jekeshelendirýdegi negizgi maqsat – atalǵan kompanııaǵa ınvestıtsııa men qarjy tartý. «Qazaq Air» jetekshi óńirlik áýe tasymaldaýshyǵa aınalýy tıis. Ózderińizde biletindeı, «Qazaq Air» óńirlik naryqtaǵy qysqa jáne uzaq qashyqtyqta barynsha tabysty. 2021 jyly kompanııa ózin ózi aqtasa, ótken jyldan bastap oń operatsııalyq tabys kórsete bastady», - dedi Saltanat Sátjan qorda ótken brıfıngte.

Onyń atap ótýinshe, «Qazaq Air» oryndaıtyn ushýlar geografııasyn keńeıtý úshin kompanııanyń odan ary damýyna serpin bere alatyn kásibı ınvestor qajet. Kompanııany jekeshelendirýdegi basty maqsat – onyń básekege qabilettiligin arttyrý, sonymen qatar básekelestik naryǵyndaǵy kvazımemlekettik sektordyń úlesin tómendetý.

Buǵan deıin «Samuryq-Qazyna» ulttyq ál–aýqat qory» aktsıonerlik qoǵamy qorǵa tıesili «Qazaq Air» AQ-nyń 49 paıyzdan 100 paıyzǵa deıingi aktsııalaryn eki kezeńdi ashyq konkýrs arqyly jekeshelendiretindigin málimdegen edi.