«Samuryq-Qazyna» ótken jyly 10 mlrd teńgege qaıyrymdylyq kórsetken
Aıta keteıik, «Samuryq-Qazyna» kompanııalar tobynyń quramynda «Qazmunaıgaz» UK, «Qazaqatomónerkásip» ulttyq atom kompanııasy, «Qazaqstan temir joly» UK, «QazaqEır» AQ, «Eır Astana» AQ, «Qazposhta» AQ syndy elge belgili kompanııalar bar. «Samuryq Qazyna» jáne oǵan qarasty enshiles kompanııalar atynan qaıyrymdylyqty biryńǵaı operator – «SAMRUK-KAZYNA TRUST» qory júzege asyrady.
«SAMRUK-KAZYNA TRUST» qorynyń 2022 jylǵy qaıyrymdylyq bıýdjeti 10 mlrd teńgeni qurady. Bul qarajatqa qamqorshylyq keńes sheshimimen 43 áleýmettik jobaǵa qoldaý kórsetildi. Tıisti qarajattyń barlyǵy áleýmettik jobalarǵa jumsaldy. Atap aıtqanda, densaýlyq saqtaý boıynsha 4 mlrd teńgege jýyq somaǵa 9 joba, bilim berý baǵytynda – 1 mlrd 250 mln teńgege 9 joba, halyqtyń osal toptaryn qoldaýǵa – 1 mlrd 700 mln teńgege 13 joba, mádenıet pen buqaralyq sportty damytýǵa – 355 mln teńge somaǵa 6 joba, óńirlerdi keshendi damytý baǵytynda – 3 mlrd teńge shamasynda 6 joba qoldaý tapqan bolatyn», - dedi «SAMRUK-KAZYNA TRUST» korporatıvti qorynyń bas dırektory Álfııa Ádıeva «Astana Opera» ǵımaratynda ótken esep berý keshinde.
Bul jumystardyń nátıjesinde 500 myń qazaqstandyqqa, onyń ishinde 55 myń balaǵa qoldaý kórsetildi, 624 adam jumyspen qamtylǵan. Densaýlyq saqtaý baǵytynda Shymkent qalasynda 600 balaǵa arnalǵan ońaltý kýrstary iske qosylsa, Qazaqstan Respýblıkasy boıynsha perınataldyq ortalyqtarǵa «Basqarylatyn gıpotermııa» jabdyqtarynyń 5 jıyntyǵy tabystaldy.
«Samuryq-Qazyna» qoldaǵan medıtsınalyq poıyzdar Qazaqstannyń 147 shalǵaı stantsııasyndaǵy 80 myń turǵynǵa kómek kórsetti. Budan bólek, ońaltý, aýtızm ortalyqtaryn qoldaý qadamdaryn atap ótken jón.
«Bilim berý baǵytynda memlekettik tildi tegin úıretip qana qoımaı, qazaq tilindegi Soile.kz, Resmi kz portaldary, Jańaózenniń úsh mektebine partalar men ınteraktıvti taqtalar alyp berý, turmysy tómen otbasylardaǵy 3 myń balany shyǵarmashylyq jáne sporttyq, aǵartý úıirmelermen qamtamasyz etý, 12 myń balaǵa mektep zattaryn tartý etý syndy jobalar boldy. Sondaı-aq, jańaózendik 200-den astam oqýshy qor qoldaýymen elimizdiń orta bilim berý ordalaryna qabyldandy», - deıdi Á. Ádıeva.
Halyqtyń osal toptaryn qoldaý aıasynda soǵys jáne eńbek ardagerleri erekshe nazarda bolyp, Qazaqstan óńirlerindegi 400 adam zamanaýı kásipterge oqytylýda. Olardyń aldy kásipterin bastap, grant negizinde kásipke qajetti qural-jabdyqtarmen qamtyldy.
Qor demegen taǵy bir joba – myńnan astam balanyń arnaıy beıimdelgen sport sektsııalaryna barýy. Mádenıet pen buqaralyq sportty damytýdaǵy qor qoldaǵan parahokkeı quramasy álem chempıonatynda kúmis júldege ıe boldy. Bes óńirdiń paravoleıbol oıynshylaryna jańa qural-jabdyqtar berildi. Óńirlerdi keshendi damytý baǵytynda Túrkistan oblysynyń úsh aýyl mektebiniń dárethanasy ishke aýystyrylǵan.
«SAMRUK-KAZYNA TRUST» qorynyń bastamasymen Atyraý jáne Túrkistan oblystarynda bıylǵy 2023 jyly Jastardy tartý ortalyqtary iske qosylady. Qostanaı oblysynyń Áýlıekól aýdanynda sport kesheni, Mańǵystaýda Jańaózen qalasy men Jetibaı aýylynda 21 sport alańyn ashý, Aqtóbe, Jambyl oblystarynyń aýyldyq ınfraqurylymyn jaqsartý sııaqty aýqymdy ister de bıylǵa ulasyp jatyr», - dedi qor basshysy.
Qor jumysyn qorytyndylaý keshi alǵash ret kópshilikke ashyq formatta ótti. Oǵan Qazaqstannyń qaıyrymdylyqpen aınalysatyn úkimettik emes uıymdary, Qazaqstan óńirlerindegi kómek alǵan balalar men eresekter, «Samuryq-Qazyna» qory tobynyń qyzmetkerleri men kompanııalarynyń basshylary, BAQ ókilderi jáne qoǵam belsendileri qatysty.
Sharada sóz alǵan «Samuryq-Qazyna» qorynyń basqarýshy dırektory Ǵıbrat Aýǵanov qaıyrymdylyqqa jumsalatyn qarjyny odan ári arttyrýdy kózdep otyrǵanyn aıtty. Jaqyn arada «Samuryq-Qazyna» qory taza tabysynyń 7 paıyzyn «Qazaqstan halqyna» áleýmettik qoryna aýdara bastaıdy. Aldyn ala boljam boıynsha, bul shamamen 130 mıllıard teńgeni quraıdy. Osylaısha, «Samuryq-Qazyna» kompanııalar tobynyń qaıyrymdylyqqa jumsaıtyn shyǵyny 13 esege artady.
Jıyn sońynda 2022 jyly qordan kómek alǵan 30-ǵa jýyq bala kontserttik baǵdarlama usyndy.
