«Samuryq-Qazyna» otandyq kásipkerlerge uzaq merzimdi tapsyrystardy berýge daıyn
ASTANA. QazAqparat - «Samuryq-Qazyna» AQ off-take kelisimsharttary boıynsha eki jobany iske qosty, dep habarlaıdy QazAqparat tilshisi.
Qordyń operatsııalyq qyzmet jónindegi basqarýshy dırektory Álisher Pirmetovtyń aıtýynsha, ótken jyly alǵash ret off-take kelisimsharttary engizildi. Oǵan sáıkes, kásipker óz jerimizde taýar shyǵarsa, «Samuryq-Qazyna» qory onymen uzaq merzimdi kelisimshartqa otyrady.
«Osylaısha, biz Qazaqstanda shyǵarylǵan ónimderdi mindetti túrde satyp alamyz degen mindettemeni óz moınymyzǵa alamyz. Máselen, ótken jyly osy úlgide eki joba iske qosyldy. Birinshisi, ol - «Asia Trafo» kompanııasynyń joǵary qýatty trasformatorlar óndirisi. Atalǵan kásiporyn jeltoqsan aıynda iske qosylyp, bizben tikeleı kelisimshart jasady. Kelisimniń jalpy somasy 4 mıllıard teńge. Ekinshisi - «QazMunaıGaz» kompanııasyna tıesili qysymdy ólsheý quraldarynyń óndirisi. Bul jobalar bizge ne beredi? Birinshiden, búginge deıin osy taýarlar Qazaqstanda shyǵarylmaǵandyqtan, kompanııalardyń qarjysy syrt jaqqa, negizinen, Reseı jáne Qytaıǵa ketse, jańaǵy kásiporyndardy iske qosqannnan keıin ol qarjy syrtqa ketpeıdi, ózimizde qalady. Osy sharalardyń nátıjesinde óz jerimizde qajetti óndirister ashylyp otyr. Jańa jumys oryndary quryldy. Oǵan qosa, jańa óndirister bıýdjetke qosymsha salyq tóleıdi. Jalpy, osy eki-úsh jyldyń ishinde biz buryn sońdy bolmaǵan ónidiristerdi ashý úshin osyndaı 10 off-take kelisimdi rásimdeýdi kózdeımiz», - dedi Á.Pirmetov Astanada ótken baspasóz máslıhatynda.
Basqarýshy dırektory «Samuryq-Qazyna» qory aıasynda satyp alýlardy ózgertý máselesine de toqtaldy. Onyń sózine qaraǵanda, buryn 4500 taýarlar men qyzmetter boıynsha barlyq satyp alýlar holdıngtiń óz ishinde júrgizildi. «Ótken jyly atalǵan kórsketkish on esege azaıdy. Holdıngtiń ózinde 409 taýarlar men qyzmetter qaldy. Qalǵany shaǵyn jáne orta bızneske berildi. Osylaısha, kásipkerler 309 mlrd teńgeniń tapsyrystaryn aldy», - dep atap kórsetti Á.Pirmetov.
Aıta keteıik, Axmetjan Esimov «Samuryq-Qazynanyń» tabysyn jarııalady. Qordyń negizgi qyzmetinen túsetin tabys 31 protsentke ósti. Al debıtorlyq qaryzdyń kólemi 80 protsentke azaıdy. Budan bólek, qor basshysy ótken jyldyń basty jetistikterin atady.
