Samuryq-Qazyna qorynyń jumysy taǵy da synǵa ilikti
«Otandyq munaı óńdeý zaýyttarynda júrgizilgen jańǵyrtý jumystaryna qaramastan, jyl saıyn elimizde munaı ónimderiniń tapshylyǵy týyndaıdy. Meniń tapsyrmam boıynsha olardyń qyzmetine tekserý júrgizildi.
Mysaly, 2020-2021 jyldary bul zaýyttardyń jumysy 410 ret jospardan tys toqtatylǵan. Atyraý munaı óńdeý zaýytynda – 372 ret, Pavlodar zaýytynda – 14 ret jáne Shymkent zaýytynda – 24 ret toqtaý bolǵan.
Munaı óńdeýdiń qoldanystaǵy shemasy tıimsiz deldaldar tabystyń negizgi úlesin ıelenip, zaýyttardyń jetkiliksiz qarjylandyrylýyna alyp keldi.
Osylaısha, aralas shemaǵa kóshý týraly sheshim qabyldandy. Bul shema munaı ónimderiniń marketıngin munaı óńdeýshi kompanııalar men zaýyttardyń ózderine júrgizýin kózdeıdi. Sol arqyly tabystaryn arttyryp, al tabys óndiristi jańǵyrtyp, eńbekaqyny kóterýge múmkindik beredi», - dedi Prezıdent.
Sondaı-aq, Prezıdent ulttyq kompanııalardyń tıimdiligin arttyrý týraly naqty tapsyrma berdi.
«Ulttyq jáne kvazımemlekettik kompanııalarda ákimshilik shyǵystar kólemdi mólsherde saqtalyp otyr. Bul – «Samuryq-Qazyna» basshylyǵynyń kemshiligi. Tyndyrylǵan jumys kóp, tyndyrylmaǵany odan da kóp.
Qordyń qalypty jumys isteýi úshin bazalyq tıistilik normatıvterin qaıta qaraý qajet. Onyń qyzmetin qaıta júkteý áli de ózekti.
«Samuryq-Qazyna» tıimdi operatsııalyq orta quryp, utymdy korporatıvtik basqarýdyń ornyna burynǵysynsha portfeldik kompanııalardyń operatsııalyq jáne satyp alý qyzmetine, kadr saıasatyna tikeleı aralasyp otyr. Mundaıda qandaı korporatıvtik basqarý men IPO týraly aıtýǵa bolady?
Strategııalyq josparlaý jáne reformalar agenttigine Úkimetpen, «Samuryq-Qazyna» qorymen birlesip, kvazımemlekettik sektordy odan ári reformalaý jóninde naqty usynystar daıyndaýdy tapsyramyn», - dedi Memleket basshysy.
Aıta keteıik, Úkimettiń keńeıtilgen otyrysynda Prezıdent úsh mınıstrge sógis jarııalady.
Foto: sk.kz
