«Samuryq-Qazyna» Qorynyń jıyntyq aktıvteri Qazaqstannyń jalpy ishki óniminiń teń jartysyn qurap otyr - N. Nazarbaev

ASTANA. QazAqparat - Qordyń jalpy jıyntyq aktıvteri Qazaqstannyń jalpy ishki óniminiń teń jartysyn qurap otyr. Astanada «Samuryq-Qazyna» AQ Transformatsııa baǵdarlamasynyń tusaýkeserine arnalǵan forým barysynda QR Prezıdenti Nursultan Nazarbaev osylaı málimdedi.

«Bıyl shıkizatqa táýeldi bolýdan ketýge baǵyttalǵan bizdiń ındýstrııalandyrý baǵdarlamamyzǵa bes jyl tolady. Buǵan túrli kózqaraspen qaraýǵa bolady, alaıda birinshi besjyldyqta qura alǵan 700 kásiporynnyń mańyzy zor. Ekinshi besjyldyq ınnovatsııalyq nysandardan turady. Mine, osylardyń barlyǵy elimizdiń konfıgýratsııasyn, jalpy eńbekke degen kózqarasty ózgertetin bolady. Biz múldem jańa jumys oryndaryn quratyn bolamyz», - dedi N. Nazarbaev.

Osy rette Prezıdent «keshegi keńestik ınertsııanyń tym kúshti bolǵanyn, bul adamdar sanasynan ózgertýdegi eń qıyn mindet bolǵanyn» atap ótti.

«Al qazirgi mindet - burynǵydan zor, ony qalaı atqarsaq, keleshegimiz de solaı qurylady. Óıtkeni, «Samuryq-Qazyna» memlekettiń eń iri aktıvterin jınap otyr. Temirjol, munaı-gaz resýrstary, tasymal, telekommýnıkatsııa, energetıka, atom ónerkásibi,álemniń 19 eline 600-den astam baǵyttaǵy qatynaýlary bar halyqaralyq avıatasymaly - munyń barlyǵy «Samuryq-Qazyna». Qordyń jalpy jıyntyq aktıvteri Qazaqstannyń jalpy ishki óniminiń teń jartysyn qurap otyr. Sońǵy úsh jylda Qor bıýdjetke 2,5 trln. teńgeden astam qarajat aýdardy. «Samuryq-Qazyna» elimizdegi eń iri jumys berýshi - 350 myń jumys orny bar», - dedi N. Nazarbaev.