Samuryq-Qazyna qorynyń qyzmetkerler sany taǵy da qysqara ma

NUR-SULTAN. QazAqparat – Búginde «Samuryq-Qazyna» qorynyń 124 qyzmetkeri qysqartylǵan. Bul týraly QazAqparat tilshisi saýalyna jaýap bergen qordyń baspasóz qyzmetinen málim etti.

«Qorda qyzmet etetin 248 jumyskerdiń 124-i qysqartyldy. Basqarýshy laýazymdar sany 10-nan 5 birlikke deıin qysqartyldy. Bul sharalar eńbekaqy tóleý qoryn azaıtýǵa, únemdeýge múmkindik berdi. Aldaǵy ýaqytta qyzmetkerler sanyn taǵy da qysqartý josparlanyp otyrǵan joq», - dep málim etti «Samuryq-Qazyna» AQ baspasóz qyzmetinen.

Prezıdenttiń reformalaý tapsyrmasyna saı, qor basshylyǵy qazaqstandyqtardan usynys jınaýdy bastaǵan edi. Osyǵan baılanysty qor el turǵyndarynan túsken usynystar jáne olarǵa jasalǵan taldaý nátıjelerimen bólisti.

«Samuryq-Qazyna» saıtynda qordyń qoǵamdyq keńesiniń paraqshasy iske qosylǵan. Onda qordy reformalaýdyń negizgi baǵyttary boıynsha óz pikirin bildirgisi keletin qoǵam ókilderine arnalǵan saýalnamalar usynylǵan. Olar bıýrokratııany joıý, bıznes-protsesterdi jetildirý, satyp alýdyń ashyqtyǵy jáne sybaılas jemqorlyqqa qarsy kúres, bıznesti qoldaý, qordyń el ekonomıkasyndaǵy úlesin azaıtý baǵyttaryn qamtıdy. Osy saýalnamalar arqyly túsken usynystarǵa taldaý jasalady. Olar qordyń qoǵamdyq keńesterinde talqylanyp, «Samuryq-Qazynanyń» menedjmentine tıisti usynymdar retinde beriledi», - dep atap ótti qordyń baspasóz qyzmetinen QazAqparat tilshisiniń saýalyna jaýap bere otyryp.

Eske sala keteıik, buǵan deıin Memleket basshysynyń synyna ilikken uıymnyń bolashaq jumys baǵyttary týraly jazǵan edik.

Prezıdent Strategııalyq josparlaý jáne reformalar agenttigine Úkimetpen, «Samuryq-Qazyna» qorymen birlesip, kvazımemlekettik sektordy odan ári reformalaý jóninde naqty usynystar daıyndaýdy tapsyrdy.

Qordyń basqarma tóraǵasy Almasadam Sátqalıev aıtqandaı, Qazaqstan azamattaryna «Samuryq-Qazyna» qory aktıvterine ıelik etý múmkindigi berilmek .

Memleket basshysynyń qordy reformalaý tapsyrmasyn oryndaý sheńberinde Jol kartasy daıyndaldy .