«Samuryq-Qazyna» qorynyń Basqarma tóraǵasy Ó.Shókeev rallı-reıdke qatysýshy komanda múshelerimen kezdesti
ASTANA. 27 qańtar. QazAqparat /Aıdar Ospanalıev/ -Búgin «Samuryq-Qazyna» Ulttyq ál-aýqat qory» aktsıonerlik qoǵamynyń Basqarma tóraǵasy Ómirzaq Shókeev rallı-reıdke qatysýshy komanda músheleri Artýr Ardavıchýspen, Marat Ábiqaevpen jáne Janat Jolymbetovpen kezdesti. Bul týraly aktsıonerlik qoǵamnyń baspasóz qyzmeti habarlaıdy.
Baspasóz málimetterine qaraǵanda, basty demeýshisi «Samuryq-Qazyna» ál-aýqat qory bolyp tabylatyn bul komanda ǵalamshardyń eń kúrdeli rallı-dakary - «Dakar 2012»-ni úlken jeńispen aıaqtap, jalpy esepte 3-inshi oryndy aldy. Ómirzaq Shókeev komanda múshelerin osy jeńisterimen quttyqtap, «Dakar» jarysynda jeńiske jetý úlken jetistik, naǵyz sensatsııa ekenin atap ótti.
«Qazaqstandyqtar shyn júrekten sizderdiń tilekterińizdi tilep, jeńiske jetýlerińizge nıettes boldy. Tipti osy «Samuryq-Qazyna» qorynyń qyzmetkerleri de sizderdiń ónerlerińizdi erekshe yqylaspen tamashalap otyrdy. Sizder ony sezingen shyǵarsyzdar degen oıdamyn»,-dedi Basqarma tóraǵasy.
Ó.Shókeev sonymen qatar, sporttyq jarystardyń naǵyz patrıottyq, óz eliń úshin, ózińniń otandastaryń úshin maqtanysh sezimin týdyratynyn atap ótti. «Sizder qazaqstandyqtardyń álemdik kóshbasshylarmen tek básekege túsip qana qoımaı, olardy jeńe de alatyndyqtaryn kórsettińizder. Bul qazirgi tańda óte mańyzdy jetistik»,-dedi Ó.Shókeev.
