«Samuryq-Qazyna» qoryna qarasty 8 ulttyq kompanııanyń basshysy aýysty
Keıingi 2-3 jyldyń kóleminde «Samuryq-Qazyna» qorynyń qyzmetine, ondaǵy basqarýdyń korporatıvtik qurylymyna, kadr saıasatyna baılanysty syn kóp aıtylyp júr. Prezıdent Qasym-Jomart Toqaev ta ulttyq ál-aýqat qory bolýǵa tıis qurylymnyń shekteýli toptyń múddesine ǵana jumys isteıtin uıymǵa aınalyp bara jatqanyn másele etip kótergen edi.
Byltyrǵy aqpan aıynda Memleket basshysy qordyń memlekettik satyp alý jumysyna kóńili tolmaıtynyn aıtqan.
«Birinshiden, bul, árıne, memlekettik satyp alýdyń ashyqtyǵy. Bul týraly men osymen úshinshi jyl aıtyp kelemin. Ázirge shynaıy ózgeristerge qol jetkizile qoıǵan joq. Onymen birge bul tenderdi ashyq ótkizýge de baılanysty. «Samuryq-Qazyna» qurylys jáne qaıta jaraqtaý salasynda aýqymdy jumys atqarady. Ádette belgili bir kompanııalar ǵana tenderdi utyp, keıin jumysty qosalqy merdigerlerge beredi. Bul, árıne, birinshiden, jumystyń sapasyna, ekinshiden, baǵa ólshemderine qatty áser etedi», -degen bolatyn Qasym-Jomart Toqaev.
Al shilde aıynda Prezıdent qorǵa qarasty ulttyq kompanııalardyń jumysy áli de tıimsiz sıpattan arylmaǵanyn ataǵan.
«Ulttyq jáne kvazımemlekettik kompanııalarda ákimshilik shyǵystar kólemdi mólsherde saqtalyp otyr. Bul – «Samuryq-Qazyna» basshylyǵynyń kemshiligi. Tyndyrylǵan jumys kóp, tyndyrylmaǵany odan da kóp», - degen bolatyn.
2022 jyly kompanııalar tobyndaǵy basqarýshy dırektorlardyń sany eki ese qysqarǵan.
Qalǵan bes basqarýshy dırektordyń úsheýi aýysqan. Osylaısha úsh basqarýshy dırektor Prezıdenttik jastar kadrlyq rezervinen tartylǵan.
Bir jyldyń ishinde qorǵa qarasty «QazMunaıGaz», «QazaqGaz», «Qazatomónerkásip», «Samuryq-Energo», «Qazposhta», «Qazaq Air», «Taý-Ken Samuryq», «Samuryq-Qazyna Óndeý» sııaqty uıymǵa 8 jańa basshy kelgen.
Jalpy byltyr «Samuryq-Qazyna» tobyndaǵy kompanııalarda jumys istep júrgen 10 sheteldik basshynyń ornyn jergilikti mamandar basqan.
Sondaı-aq, dırektorlar keńesi men baqylaý keńesteriniń quramyndaǵy sheteldikterdiń sany bir jyl ishinde 23-ten 14 adamǵa nemese 40% qysqarǵan.
Ǵıbrat Aýǵanov byltyrdan bastap basshylyq qyzmetke úmitkerlerdi taǵaıyndamas buryn olardy shyndyq detektorynan ótkizý mindettelgenin eske saldy. Mundaı tekseristen negizinen satyp alý jumysyna qatysty mamandar ótken kórinedi. Onyń qorytyndysyna qarasaq, qorǵa qarasty 52 kompanııaǵa jumysqa turýǵa ótinish bildirgen 133 úmitker shyndyq detektory arqyly synaqqa tartylyp, 27-si synaqtan ótpegendikten jumysqa qabyldanbaǵan.
Bul qysqartýlardan únemdelgen qarajat jalpy ujymnyń eńbekaqysyn kóterýge baǵyttalypty.
Ǵıbrat Aýǵanovtyń aıtýyna qaraǵanda, 243 myń adamnyń jalaqysy 5-48 paıyz aralyǵynda ósken. Sondaı-aq, ol ásirese jalaqysy tómen laýazymdarǵa basa nazar aýdarylǵanyn aıtty.
«Buǵan deıin tómen jalaqy alatyndarǵa kóbirek qosylsa, jalaqysy joǵarylarǵa ústeme az qosyldy. Osylaısha jumysshylar arasyndaǵy jalaqy aıyrmashylyǵyn azaıtýdy kózdep otyrmyz. Bıyl da bul jumysty jalǵastyramyz. Josparǵa sáıkes Qazaqstan boıynsha jalaqysy ortasha deńgeıden tómen qyzmetkerlerge 3 paıyzdan 39 paıyzǵa deıin qosymsha ósim qarastyrylǵan. Bizde osy sanatqa kiretin 8,5 myńǵa jýyq adam bar», - dedi qordyń qoǵammen baılanys, áleýmettik-eńbek qatynasy jáne eńbekti qorǵaý jónindegi basqarýshy dırektory.
Qor byltyr Samruk-Kazyna Trust qaıyrymdylyq jobalary arqyly el aýmaǵynda 43 áleýmettik bastamany júzege asyryp, 500 myńǵa jýyq adamǵa kómektesken. Sol jobalardy iske asyrý úshin qordyń qaıyrymdylyqqa bóletin bıýdjeti 40 paıyz, ıaǵnı 10 mıllıard teńgege deıin artqan. Osy jobalar aıasynda respýblıka boıynsha 624 jańa jumys orny ashylǵan.
Bul somaǵa «Qazaqstan halqyna qoryna» aýdarylatyn qarajatty qossaq, qaıyrymdylyqqa bólinetin qarajattyń jyl saıynǵy kólemi kóbeıip otyr.
«Bıyl bul jumysty jalǵastyramyz, sonymen qatar taza paıdanyń 7 paıyzyna deıingi qarajatty «Qazaqstan halqyna» áleýmettik qoryna aýdaramyz. Bul soma shamamen 130 mlrd teńgeni quraıdy, ıaǵnı qaıyrymdylyqqa bóletin bıýdjet kem degende 13 ese ósedi.
Endi eńbekti qorǵaý taqyrybyna toqtalyp óteıin. «Samuryq-Qazyna» kompanııalar toby úshin 2022 jyly jarııalanǵan «Qaýipsizdik jáne eńbekti qorǵaý jyly» aıasynda enshiles kompanııalar Qormen birlesip kóptegen jumys atqardy. Bul 2021 jylmen salystyrǵanda jumysta jaraqattaný kórsetkishin 16% tómendetti.
Qor Vıjn Zero halyqaralyq kontseptsııasyna qosyldy. Ónerkásip qaýipsizdigin basqarý júıesin damytý bastaldy. Eńbek jaǵdaıyn jaqsartý boıynsha sheberlik sabaqtaryn, jattyǵýlar men kýrstardy únemi ótkizip turamyz», - dedi Ǵıbrat Aýǵanov.
Baspasóz máslıhatynda usynylǵan málimetterge qaraǵanda qor ózine qarasty óndiris oshaqtarynda eńbek qaýipsizdigin jetildirýge nazar aýdara bastaǵan.
«Onda qordyń jáne óndiristik kásiporyndarymyzdyń basshylary álemdik ozyq tájirıbeni engize otyryp, kásiporyndarda jaraqattanýdy múldem boldyrmaýǵa umtylý týraly mindettemege kópshilik aldynda qol qoıdy.
Qoǵammen baılanys salasynda ashyqtyq qaǵıdatyn engizip jatyrmyz. 2022 jyly «Samuryq-Qazyna» qorynda Qoǵamdyq keńes jumysyn bastady. Búgingi kúnge deıin 13 otyrys ótkizildi. Olarǵa 230 qazaqstandyq jetekshi-sarapshy qatysty. Olar Qor basshylyǵyna 118 usynys berdi. Búginde usynystyń basym bóligi jumysqa alyndy.
Qoǵamdyq keńes jumysyn odan ári nyǵaıtý jáne tıimdiligin arttyrý maqsatynda bıyl onyń quramyn 1,5 esege, ıaǵnı 10-nan 15 adamǵa deıin arttyrý josparlanyp otyr», - dedi qordyń qoǵammen baılanys, áleýmettik-eńbek qatynasy jáne eńbekti qorǵaý jónindegi basqarýshy dırektory.
Aıta ketý kerek, qarasha aıynda Memleket basshysy Qasym-Jomart Toqaev «Samuryq-Qazyna» qorynyń iri aktıvteri jaqyn ýaqytta ashyq kompanııalarǵa aınalatynyn málim etken bolatyn.
Qazirgi ýaqytta Qor ashyqtyq pen tıimdilikti arttyrý úshin keshendi túrde transformatsııalanyp jatyr. Osy rette Qordyń portfeldik kompanııalaryn jekeshelendirý – negizgi bastamalardyń biri. Ulttyq munaı kompanııasy, áýe kompanııasy jáne temirjol kompanııasy sııaqty Qordyń iri aktıvteri jaqyn ýaqytta ashyq kompanııalarǵa aınalady. Munaı salasyndaǵy jetekshi «QazMunaıGaz» kompanııasy bıyl kúzde Qazaqstanda IPO ótkizedi», - degen edi Prezıdent.
