«Samuryq-Qazyna» qoryn túbegeıli qaıta qurý júrip jatyr –Prezıdent
Qazaqstan Prezıdenti básekelestikti damytý, sybaılas jemqorlyqty joıý, tıimdi memlekettik basqarýdy qurý jáne sapaly adamı kapıtal qalyptastyrý kózdegen maqsatqa jetkizetin jol dep atap ótti. Osyǵan oraı Memleket basshysy birqatar ózekti mindetke nazar aýdardy.
Atap aıtqanda, Prezıdent ádil ári beıtarap sot júıesi ǵana qýatty ekonomıka men laıyqty bıznes-klımat qurýdyń negizi ekenine toqtaldy. Investorlardyń zańdy múddeleri men quqyqtaryn qorǵaýdyń basty kepili dál osy bolýǵa tıis. Memleket basshysy ınvestıtsııalyq daýlardy sheshý boıynsha Astana halyqaralyq qarjy ortalyǵy men Halyqaralyq arbıtraj ortalyǵynyń áleýetin tolyq paıdalanýǵa shaqyrdy. Qasym-Jomart Toqaev adal básekelestikti damytý isin jańa baǵyttyń taǵy bir mańyzdy basymdyǵy dep sanaıdy.
«Ekonomıkanyń negizgi salalaryndaǵy olıgopolııalardyń tarıhı ústemdigi naryqtar men salalardyń damýyn tejeıdi. Bul jaǵdaıdy zańnamalyq jáne praktıkalyq turǵydan batyl ózgertetin bolamyz. Bıyl qol qoıylǵan básekelestikti damytý máselesi jónindegi zańda mańyzdy bastamalar qarastyrylǵan. Bul – naryq sýbektileriniń shekteýli resýstarǵa qoljetimdiligi, naryqqa kirý kedergilerin tómendetý jáne aralas naryqtarǵa monopolııanyń keri áserin joıý.
«Samuryq-Qazyna» qoryn túbegeıli qaıta qurý jumystary júrip jatyr. Ákimshilik resýrstardyń esebinen tapsyrys alǵan kompanııalar ózderiniń artyqshylyqtary men kelisim-sharttarynan aırylýda. Qordyń ınvestıtsııalyq jobalarynyń toptamasy – shamamen 3,5 trıllıon teńge. Budan bylaı barlyq jobalar ashyq ári konkýrs negizinde halyqaralyq kompanııalardyń qatysýymen júzege asyrylatyn bolady. Eger, olaı bolmaı jatsa, birden maǵan tikeleı habarlańyzdar. Óıtkeni bul – meniń prezıdenttik qyzmetimdegi asa mańyzdy is», – dedi Qasym-Jomart Toqaev.
Jıynǵa Prezıdent Ákimshiliginiń basshylyǵy, Úkimet músheleri, memlekettik organdardyń ókilderi, iri transulttyq jáne ulttyq kompanııalardyń jetekshileri qatysty.
Kezdesýge qatysýshylar adamı kapıtaldy kúsheıtýge, ekonomıka men ınvestıtsııalyq saıasatqa ekologııalyq, áleýmettik jáne korporatıvtik basqarýdyń standarttaryn engizýge basa mán bere otyryp, elimizdiń ınvestıtsııalyq tartymdylyǵyn jaqsartý jóninde birqatar usynys aıtty.