«Samuryq-Qazyna» qorymen daǵdarysqa qarsy baǵdarlama aıasynda alǵan qarajatty qaıtarý týraly kelissóz júrgizip jatyrmyz - Úmit Shaıahmetova
ALMATY. Sáýirdiń 6-cy. QazAqparat /Erlik Erjanuly/ - «Qazaqstan halyq banki» AQ daǵdarysqa qarsy baǵdarlama aıasynda «Samuryq-Qazyna» ulttyq ál-aýqat qorynan alǵan qarajattyń belgili bir bóligin qaıtarýǵa qazirgi tańda daıyn.
Ony banktiń Basqarma tóraǵasy búgin Almatyda ótkizgen baspasóz máslıhatynda aıtty, dep habarlaıdy QazAqparat.
«Búgingi tańda «Samuryq-Qazyna» ulttyq ál-aýqat qory» AQ-men kelissóz júrgizip jatyrmyz. Onda 60 mıllıard teńge kólemindegi qysqa merzimdik depozıtter men daǵdarys jaǵdaıynda qoldaý maqsatynda bank kapıtalyna engizilgen qarajatty qaıtarý jaıy talqylanyp jatyr. Onyń naqty detaldaryn jaqyn arada arnaıy habarlaıtyn bolamyz», deıdi «Qazaqstan halyq banki» AQ-nyń Basqarma tóraıymy Úmit Shaıahmetova. Onyń aıtýynsha, «Samuryq-Qazyna» qory tarapynan ótken jyly daǵdarysqa qarsy baǵdarlama aıasynda berilgen qarajat bankke úlken kómek boldy. Sondaı-aq bank zaemshylaryna óz septigin tıgizdi.
2009 jyly «Samuryq-Qazyna» UÁQ» AQ 27 mıllıard teńge somasynda banktiń jaı aktsııalaryn jáne 33,1 mıllıard teńgege artyqshylyqty aktsııalaryn satyp alǵan bolatyn. Bul banktiń menshikti kapıtalynyń 47,1 paızyǵa ósip, 281 mıllıard teńgege jetýine óz yqpalyn tıgizdi.
