«Samuryq-Qazyna» qory otandyq jetekshi oqý oryndary men kásibı-tehnıkalyq mektepterine bilim berý tapsyrysyn júzege asyrýdy josparlaıdy
ASTANA. Aqpannyń 18-i. QazAqparat /Qanat Mámetqazyuly/ - «Samuryq-Qazyna» UÁQ otandyq jetekshi oqý oryndary men kásibı-tehnıkalyq mektepterine bilim berý tapsyrysyn júzege asyrýdy josparlap otyr.
Bul týraly QazAqparat Qordyń baspasóz qyzmetine silteme jasap habarlaıdy. «Búgingi kúni «Samuryq-Qazyna» UÁQ-ynda korporatıvti kadrlyq saıasattyń jańa úlgisi jasaldy. Qor Basqarmasynda Kadr saıasaty jónindegi komıtet qurylyp, atalǵan Komıtet Qor tobyndaǵy kompanııalarda kadr saıasatynyń jańa qaǵıdattaryn júzege asyrýmen, olardy qadaǵalaýmen aınalysady. Budan bólek, saraptaý, basqarý, kompanııalar men olardyń qyzmetkerleriniń baǵdary sekildi júıeler engiziledi. Bul shara Qorǵa qarasty kompanııalardyń bıznes-josparlaryn strategııalyq maqsattarymen ushtastyratyn bolady», delingen baspasóz baıanynda.
Sonymen birge, aldaǵy ýaqytta «Samuryq-Qazyna» Qory otandyq ýnıversıtettermen jáne bilim ortalyqtarymen yntymaqtastyǵyn jalǵastyra túsetin bolady. Búgingi kúni Qor tobynda ındýstrııaldyq-ınnovatsııalyq damý baǵdarlamasymen, Qordyń ınvestıtsııalyq jobalarymen jáne kásiporyndarymen sáıkestendirilgen ınjenerlik-tehnıkalyq kadrlardy damytýdyń on jyldyq baǵdarlamasy ázirlený ústinde.
«Qor tehnıkalyq kadrlarǵa qatysty suranysty zertteı kele otandyq jetekshi oqý oryndary men kásibı-tehnıkalyq mektepterine bilim berý tapsyrysyn júzege asyrýdy josparlap otyr», delingen baspasóz baıanynda.
