«Samuryq-Qazyna» qory men Nazarbaev Ýnıversıteti ǵylymı-zerthanalar qurmaq
ASTANA. QazAqparat - «Samuryq-Qazyna» AQ kompanııalary - «Taý-Ken Samuryq» AQ, «Samuryq-Energo» AQ jáne «Birlesken hımııalyq kompanııa» JShS - «Nazarbaev Ýnıversıtet» DBBU (ári qaraı - Ýnıversıtet) hımııalyq, kómir jáne geologııalyq ǵylymı-zertteý zerthanalaryn qurý boıynsha jol kartalaryna qol qoıdy, dep habarlaıdy «Samuryq-Qazyna» ulttyq ál aýqat qory» aktsıonerlik qoǵamynyń baspasóz qyzmeti.
Bekitilgen jol kartalary sheńberinde Ýnıversıtet negizinde tájirıbelik ǵylymı-óndiristik ortalyqtardy qurý jáne jabdyqtaý boıynsha jumys júrgizý josparlanýda. Bul bastamany Qor ókilderi memleket basshysynyń Qazaqstannyń úshinshi jańǵyrýy týraly tapsyrmasyna sáıkes qolǵa alǵan.
«Búginde bizdiń kompanııalarymyz memlekettik ındýstrııaldy-ınnovatsııalyq damý baǵdarlamasynyń ustanymdaryna saı ázirlengen bastamalardy júzege asyrýda. Kez-kelgen jańǵyrtýdyń máni óndiriske tehnologııalardy engizýmen baılanysty. Nazarbaev Ýnıversıtetimen qarym-qatynasty nyǵaıtý arqasynda bizdiń ósip kele jatqan jáne jetilgen kompanııalarymyz kásiporyndarynyń aldynda turǵan naqtyly mindetterdi sheshý úshin irgeli zertteýlerdi júrgizýge múmkindik alady. Nazarbaev Ýnıversıteti bolsa, óz kezeginde zerthana alańyna qol jetkizedi, sonymen qatar tájirıbelik zertteýlerdi ótkizip, kompanııalarymyzdyń qaramaǵyndaǵy ken oryndarynan materıaldardy synaı alady. Osy birlesken jumystyń nátıjesi joǵary bolatynyna úmit artamyz», - dep atap ótti «Samuryq-Qazyna» AQ basqarma tóraǵasy Ómirzaq Shókeev.
«Qazirgi tańda biz ózara seriktestiktiń úsh negizgi baǵytyn aıqyndap aldyq. Nazarbaev Ýnıversıteti men «Samuryq-Qazyna» qorynyń birlesken jobalarǵa kiriskenine qýanyshtymyn. Bul rette bizdiń fakýltet ár alýan salalardaǵy ǵalamdyq tájirıbesi men bilimderimen bólisýge daıyn. Qordyń qoldaýymen ónerkásip, bıznes pen zertteý fakýlteti arasynda tyǵyz qarym-qatynasty ornatý maqsatynda biz naqtyly tájirıbelik zertteýlerdi júzege asyramyz» - dedi «Nazarbaev Ýnıversıtet» DBBU Prezıdenti Shıgeo Katsý.
Jol kartalary aıasynda bıylǵy jyldyń kúzinde agrohımııa ónimderin halyqaralyq talaptarǵa sáıkes sertıfıkatsııalaý boıynsha jumys isteıtin alǵashqy zerthanalar ashylady dep kútilýde. Sonymen qatar 2017 jyldyń sońyna deıin Ýnıversıtet negizinde munaı óńdirý salasynda zertteý júrgizý úshin arnaıy zerthanany qurý kózdelgen. Al taý-ken ǵylymı -óndiristik ortalyqtardyń negizinde baıytýdan bastap metallýrgııaǵa deıingi tehnologııalyq tizbek boıynsha ónerkásiptik synaqtar júzege asyrylmaq.
Aldaǵy ýaqytta Qor Ýnıversıtetpen seriktestikti keńeıtýdi kózdeıdi. Jyl aıaǵyna deıin Qordyń salalyq qorjyndyq kompanııalary men Ýnıversıtet arasynda munaı-gaz jáne energetıka salalaryna qatysty ǵylymı-zertteý zerthanalaryn qurý jónindegi jańa jol kartalaryn bekitý josparlanýda.
