«Samuryq-Qazyna» qory men Astana qalasynyń ákimdigi úlestik qatysýdaǵy qurylys nysandaryn 2010 jyldyń sońyna deıin aıaqtamaq - ákimdiktegi keńes
ASTANA. Aqpannyń 9-y. QazAqparat /Gúlmıra Álıakparova/ - Aldymyzǵa qoıylyp otyrǵan mindet - Astana qalasynda úlestik qatysýmen salynyp jatqan turǵyn úılerdiń qurylystaryn 2010 jyldyń sońyna deıin tolyǵymen aıaqtaý. Bul týraly búgin elorda ákimdiginde qurylys nysandaryn aıaqtaýǵa arnalǵan keńeste qala basshysy Imanǵalı Tasmaǵambetov málim etti,
dep habarlaıdy QazAqparat.
Elimizdiń bas qalasynda júrip jatqan turǵyn úı qurylysyn ústimizdegi jyldyń sońyna deıin aıaqtaý máselesine arnalǵan keńeske «Samuryq-Qazyna» UÁQ» AQ, «Jyljymaıtyn múlik qory» AQ, «Jańa qurylys» JShS men turalap qalǵan nysandardyń qurylysyna jumyldyrylǵan basqa da kompanııalardyń birinshi basshylary, sondaı-aq Astana qalasy ákiminiń orynbasarlary jáne merdigerler qatysty.
«Astana - sáni men sáýleti úndesken úlken qurylys alańy. Qurylystaǵy úleskerlerdiń máselesi eń basty nazarymyzdaǵy dúnıe. Sebebi, úlestik qurylysta azamattarymyzdyń taǵdyry, turmystyq múddesi jatyr. Sondyqtan, aldymyzǵa qoıylyp otyrǵan mindet - elordada úlestik qatysýmen salynyp jatqan turǵyn úılerdiń qurylysyn 2010 jyldyń sońyna deıin tolyǵymen aıaqtaý», - dep atap ótti I.Tasmaǵambetov.
Astana ákiminiń aıtýynsha, bul mindetti «Samuryq-Qazyna» qory men qala ákimdiginiń aldyna Úkimet te qoıyp otyr jáne ony oryndaý úshin eki vedomstvoǵa tolyq múmkindikter berilgen.
Aıta keteıik, qurylys salasynda jahandyq daǵdarys bastalǵan 2007 jyly Astana qalasynda 37 myńnan astam úleskerdiń qatysýymen qurylysy aıaqtalmaǵan 227 nysan boldy. Qolǵa alynǵan sharalardyń nátıjesinde olardyń sany 2008 jyly - 201-ge, 2009 jyldyń basynda - 128-ge azaıdy. 2009 jyl ishinde 12 myńnan astam úlesker qatysqan 62 turǵyn úıdi aıaqtaýǵa múmkin boldy. Al 2010 jyly 13 myńǵa jýyq úleskeri bar qalǵan 61 nysandy aıaqtap, atalmysh saladaǵy problemany tolyǵymen sheshý kózdelip otyr.
