«Samuryq-Qazyna» qory Qazaqstannyń birqatar sport túrlerine qarjylaı demeýshilik jasaıdy
ASTANA. Qyrkúıektiń 2-si. QazAqparat /Jasulan Amanbaıuly/ - «Samuryq-Qazyna» qory Qazaqstannyń kúres, aýyr atletıka, sý doby, voleıbol jáne qaıyq esý sport túrleriniń damýyna qomaqty qarjy bólip otyr.
«Samuryq-Qazyna» Ulttyq ál- aýqat qory» AQ álemdik deńgeıde óner kórsetip júrgen «Astana» veloshabandozdar klýbyna jáne elordalyq «Barys» hokkeı komandasyna demeýshilik etetini belgili. Endigi kezekte «Samuryq-Qazyna-Astana» Korporatıvti qory arqyly kúreske 100 mln. teńge, aýyr atletıkaǵa 147 mln. teńge, sý dobyna 50 mln. teńge, voleıbolǵa 200 mln. teńge jáne qaıyq esýge 22 mln. teńge qarajat bólý qarastyrylǵan.
Qordyń Bas dırektory Dáýlet Turlyhanovtyń aıtýynsha, qarjy maqsatsyz bólinbeıdi, qaıta elimizde áleýeti joǵary, bolashaǵy bar, dástúri men tájirıbesi kóp jyldar boıy qalyptasyp úlgergen basymdyqty sport túrlerin qoldaýǵa jumsalady. Máselen, «Barys» hokkeı klýbynyń bıýdjeti 27 mln. dollar, al «Astana» velokomandasynyń bıýdjeti 20 mln. dollardy qurady. «Árıne, aqsha jaıdan -jaı bóline salmaıdy. Komandalardyń jyldyq qajettiligi jiti saralanady. Sonymen qatar olardan mindetti túrde sporttaǵy nátıje jáne jarnama talap etiledi. Degenmen óz basym «Astana» velokomandasy syndy aýqymdy joba álemde áli joq dep esepteımin», deıdi D. Turlyhanov.
«Keıbir sport túrleri boıynsha biz ózimizdiń pozıtsııamyzdy qoldan shyǵaryp aldyq. Sý doby sportynda biz Azııa oıyndarynda birinshi oryn alamyz dep nyq senimmen aıtatynbyz. Al ótken Azııa birinshiliginde komandamyz úshinshi oryndy ıelendi. Qytaı, Iran, Japonııa komandalary ósip, aldymyzdy orap jatyr», dep atap kórseti ol.
D. Turlyhanovtyń aıtýynsha, búgingi tańda dzıýdo, qyzdar arasyndaǵy sý doby, basketbol, bıatlon jáne shańǵy tebý sporttaryna demeýshilik kórsetý jaıy qarastyrylyp jatyr.
Dırektorlar keńesi sheshimimen 2010 jyldyń 29 qańtarynda sporttyq jobalardy qarjylandyrýdaǵy sharýalaryn retke keltirip otyratyn «Samuryq-Qazyna-Astana» Korporatıvti qoryn qurý týraly sheshim shyǵardy. Qordyń Bas dırektory bolyp Dáýlet Bolatuly Turlyhanov taǵaıyndalǵan bolatyn.
Korporatıvti qor «SK» Qorynyń áleýmettik jáne qaıyrymdylyq jobalaryn basqarýmen, úılestirý jumystarymen aınalysady. Korporatıvti qor korporatıvti basqarýdyń álemdik dárejesine saı quryldy. Qazirgi ýaqytta «Samuryq-Qazyna-Astana» Korporatıvti qory elde sportty qoldaý, damytý, nyǵaıtý, sonymen qatar elde úlken jetistikterge jetip júrgen sport túrleri men jalpy jurtqa arnalǵan sport túrlerin damytý sekildi máselelerge den qoıýda. «Samuryq-Qazyna-Astana» Korporatıvti qory sportshylar men jattyqtyrýshylardy daıyndap, joǵarǵy dárejedegi sport mamandaryn elge tartýmen aınalysady.
