«Samuryq-Qazyna» qory ıpotekalyq naryqty nesıelendirýge baǵyttalǵan qarjynyń 66 paıyzyn bankterge saldy
ASTANA. Jeltoqsannyń 23-i. QazAqparat /Aıdar Ospanalıev/ - 2007-2008 jyldar aralyǵynda daǵdarysqa qarsy baǵdarlama aıasynda eldiń ıpoteka naryǵyn turaqtandyryp, úleskerlerdiń quqyqtaryn qorǵaý jáne qurylys nysandaryn aıaqtaý úshin «Samuryq-Qazyna» ál-aýqat qoryna 95 mıllıard teńge bólingen.
Olardyń 48,8 mıllıardy Astanadaǵy, 46,2 mıllıard teńgesi Almatydaǵy qurylys nysandaryn aıaqtaý úshin berilgen. Qazirgi tańda «Samuryq-Qazyna» qory atalmysh qarjynyń 66 paıyzyn bankterge salǵan. Bul týraly búgin Astanada úlestik qurylysty qoldaýǵa baǵyttalǵan dóńgelek ústel otyrysynda málim boldy, dep habarlaıdy QazAqparat.
Otyrysqa qatysýshylardyń sózderine qaraǵanda, bankterge qarjy salýdaǵy negizgi talaptardyń biri - qurylys kompanııalarynyń nysandaryn aıaqtaý bolyp tabylady. Bul ustanymǵa sáıkes,
bankter qurylysshy surap otyrǵan qarjynyń 15 paıyzyn ózderi qarjylandyrýlary qajet. Al qalǵan 85 paıyzdy qor bankterdiń qurylys kompanııalaryn nesıeleý úshin maqsatty túrdegi depozıt retinde salady. Búginde osyndaı birlesken is-qımyldardyń nátıjesinde Astanada 3 myń 284 úleskeri bar 19 turǵyn úı qurylysy aıaqtaldy. Bankter keıbir nysandardy qarjylandyrý jumystaryn ózderi aıaqtady. Óıtkeni qordyń arqasynda qurylysy aıaqtalǵan páterlerdi satyp alýǵa azamattardyń ózderi nıet bildirdi, bul jaǵdaıdy qurylysshylar qarjylandyrý kózi retinde paıdalandy.
Almatyda da 14 nysannyń 10-y aıaqtaldy. Onda 1 myń 267 úlesker bar. Qalǵan nysandar «Qýat» korporatsııasyna qatysty. Olar boıynsha Úkimettiń arnaıy sheshimderi bar. Buǵan qosa, Úkimettiń 2009 jyldyń 9-qazanyndaǵy № 1553 qaýlysy boıynsha Almatydaǵy «Saıran», «Úshtóbe» turǵyn úı keshenderi men Astana qalasyndaǵy «Grand Alataý» kesheniniń qurylysymen «Global Bıldıng Kontrakt» jaýapkershiligi shekteýli seriktestigi aınalysady. Sondaı-aq «Stresstik Aktıvter Qory» da qurylys nysandaryn nesıeleýge bankterge qajetti qarjy bólýde.
