«Samuryq-Qazyna Kontrakt» JShS-i otandyq ónim óndirýshilerdi reestrge engizýge qatysty arnaıy málimdeme taratty

ASTANA. Aqpannyń 2-si. QazAqparat /Qanat Mámetqazyuly/ - «Samuryq-Qazyna» Ulttyq ál-aýqat Qorynyń enshiles kompanııasy bolyp tabylatyn «Samuryq-Qazyna Kontrakt» JShS-i Qor tobyndaǵy satyp alý sharalaryn jetildirýge ókiletti ári ondaǵy qazaqstandyq qamtýdy qadaǵalap otyrady.

Kompanııa otandyq ónim óndirýshiler reestrine tirkelý aqysyz negizde, tegin engiziletinin resmı túrde málimdeıdi. Bul týraly QazAqparat Qordyń baspasóz qyzmetine silteme jasap habarlaıdy.

«Sońǵy kezderi qazaqstandyq kásipkerler tarapynan birshama shaǵymdar jasalynyp, ol boıynsha otandyq ónim óndirýshilerge bázbir azamattar men uıymdar tarapynan Reestrge «engizýge kepildeme beredi» eken jáne sol «qyzmeti» úshin 30 myń teńge suraıdy eken, degen daqpyrt taralypty. Osyǵan baılanysty, «Samuryq-Qazyna Kontrakt» JShS mynadaı málimdeme taratady: «Tek «Samuryq-Qazyna Kontrakt» JShS ǵana Reestrge otandyq taýar óndirýshilerdi engizip, ony qurylymdaýmen aınalysady jáne múgedekter uıymdary Reestrin, adal jumys isteıtin jabdyqtaýshylar tizimin, senimsiz jabdyqtaýshylar tizimin jasaıdy. Reestr men Tizimge qosqany úshin aqsha talap etilmeıdi. «Samuryq-Qazyna» Ulttyq ál-aýqat Qory» men «Samuryq-Qazyna Kontrakt» JShS Reestr men Tizimdi qurylymdaıtyn kezde deldal kompanııalar men jeke tulǵalardyń qyzmetin paıdalanbaıdy. Reestrge ený úshin arnaıy «qyzmet» usynatyn deldal kompanııalar men tulǵalardyń sharalary zańsyz. Mundaı jaǵdaımen kezikkender quqyq qorǵaý uıymdaryna habarlasýy kerek», delingen baspasóz aıǵaǵynda.

Esterińizge sala keteıik, Reestrge ený úshin qajetti erejeler men úrdister týraly tolyq aqparattar www.samruk-kazyna.kz arnaıy veb-saıtynda ornalasqan.