«Samuryq-Qazyna» kompanııalaryn halyqaralyq qarjy naryǵyna shyǵarady - Ahmetjan Esimov

NUR-SULTAN. QazAqparat - «Samuryq-Qazyna» ulttyq ál-aýqat qory» AQ Basqarma tóraǵasy Ahmetjan Esimov Óskemen qalasyna jumys sapary barysynda «Úlbi metallýrgııalyq zaýytynyń» 70 jyldyǵyna arnalǵan sharaǵa qatysty, dep habarlaıdy QazAqparat kompanııanyń baspasóz qyzmetine silteme jasaı otyryp.

Ahmetjan Esimov sóz aldynda zaýyt ujymyn mereıtoılarymen quttyqtady. Aıta keteıik, «Úlbi metallýrgııa zaýyty» «Samuryq-Qazyna» qorynyń iri qorjyndyq kompanııalarynyń biri – «Qazatomónerkásip» AQ-nyń enshiles kásiporny.

Ahmetjan Esimov quttyqtaý sózinde qordyń úlken portfeldik kompanııalary IPO-ǵa shyǵatynyn, sonymen qatar, «Samuryq-Qazynanyń» jekeshelendirý baǵdarlamasynyń bolashaǵy týraly aıtty. Qazaqstan Respýblıkasynyń Úkimeti qordyń 2016-2020 jyldarǵa arnalǵan jekeshelendirý týraly baǵdarlamasyn bekitken bolatyn.

«Qazatomónerkásip» álemniń qarjy naryqtaryna tabysty shyqty, bul – kompanııa halyqaralyq deńgeıde tanymal ekendigin kórsetedi. Sonymen qatar, halyqaralyq qarjy naryǵy kompanııanyń tabysty damýyna, korporatıvtik ashyqtyq pen basqarýyna jaǵdaı jasaıdy.

«Qazatomónerkásip» bizdiń alǵashqy jarııalaǵan kompanııamyz. Osy tájirıbeni eskere otyryp, «Samuryq-Qazyna» qory basqa da kompanııalardy halyqaralyq qarjy naryqtaryna shyǵarady, bul tek osy kompanııalardyń jaǵdaıyna ǵana emes, jalpy el ekonomıkasyna oń áser etedi», - dedi Ahmetjan Esimov.

«Qazatomónerkásip» kompanııasy 2018 jyldyń qarashasynda, Jekeshelendirýdiń keshendi jospary aıasynda halyqaralyq qor naryǵyna shyqqan bolatyn. IPO bastalǵannan beri «Qazatomónerkásip» aktsııalarynyń baǵasy aıtarlyqtaı ósip, kompanııanyń quny qazirgi ýaqytta 3 mlrd dollardan 3,5 mlrd dollarǵa jetti.

Aıta ketken jón, «Qazatomónerkásip» álemdegi eń iri tabıǵı ýran óndirýshi. Bul kompanııa álemdik ýran óndirisiniń 23 paıyzyna ıe jáne de shamamen 21 myń adamdy jumyspen qamtyp otyr.

Qor basshysy atap ótkendeı, Úlbi metallýrgııa zaýytynda jańa tehnologııalar engizilmek, sáıkesinshe, tyń ózgeristerdiń arqasynda Qazaqstannyń aldynan jańa naryqtarǵa jol ashady.

«Úlbi mettalýrgııa zaýyty qazir tórt myńǵa jýyq joǵary bilimdi maman jumys isteıtin álemdik mańyzy bar úlken zamanaýı óndiris. Qoldanystaǵy tehnologııalardyń arqasynda ýran óndirisi jylyna 3600 tonnadan 6000 tonnaǵa deıin ulǵaıtýǵa múmkindik bar. 2020 jyly zaýytta tabletkalyq óndiristi jańǵyrtý jónindegi joba aıaqtalady. Osynyń arqasynda, elimizde otyn tabletkalaryn óndirý kólemi jylyna 400 tonnaǵa deıin artady», - dedi sóz sońynda Ahmetjan Esimov.