«Samuryq-Qazyna» kompanııalar tobynyń qunyn arttyratyn jobamen aınalysýda
Bul týraly Halyqtyq IPO baǵdarlamasynyń resmı saıtynda habarlandy.
Memlekettik holdıngtiń baspasóz qyzmetinen habarlaǵanyndaı, atalǵan joba «aǵymdaǵy shottardaǵy qarajat sanyn azaıtý jáne olardy salymdarda (depozıt) ulǵaıtý, valıýta satyp alý-satý operatsııalaryn ortalyqtandyrý, kompanııanyń barlyq toptarynda banktik tarıfterdi tómendetý men birizdendirý jumystaryn júrgizý esebinen» 15 mıllıard teńgeden astam qarajatty únemdeýge múmkindik bergen. Mundaı málimetter «Samuryq-Qazyna» basqarmasynyń 14 tamyzda ótken keńeıtilgen otyrysynda aıtyldy.
«Basqarma otyrysynda «Samuryq-Qazyna» AQ-nyń Qorda jáne onyń birqatar enshiles kompanııalarynda, atap aıtqanda, «QazMunaıGaz» UK» AQ, «QazPoshta» AQ, «QTJ» UK» AQ, «Samuryq-Energo» AQ qazynashylyq operatsııalardy basqarýdyń nysanaly úlgisin qanatqaqty negizde engizý boıynsha qarjylyq bóliginiń esebi tyńdaldy. Bul joba aqshalaı qarajattardy tıimdi paıdalanýǵa, qaryz aýyrtpalyǵyn azaıtýǵa, qor kompanııalarynyń tabystylyǵy men qunyn arttyrýǵa baǵyttalǵan»,-delingen baspasóz baıanynda.
Jańa qazynashylyq úlgini holdıngtiń barlyq enshiles kompanııalarynda 2013 jyldyń aıaǵy men 2014 jyldyń basynda engizý qarastyrylǵan.
