«Samuryq-Qazyna» ınvestorlarmen kezdesý úshin Nıý-Iork, London, Gonkongqa saparlaıdy
Bul jaıynda «Samuryq-Qazyna» qory basshylyǵynyń dıplomatııalyq korpýs, halyqaralyq kompanııalar ókilderimen jáne ınvestorlarmen kezdesýi barysynda qordyń basqarma tóraǵasy Ómirzaq Shókeev málim etti, dep habarlaıdy QazAqparat.
«Biz Elbasynyń tapsyrmasyna sáıkes elimizdiń Syrtqy ister mınıstrliginiń uıymdastyrýymen birqatar kezdesýlerdi bastaımyz. Bul kezdesýlerdiń barysynda qordyń jekeshelendirý, transformatsııa baǵdarlamalary jaıynda ınvestorlarymyzdy, elshilerdi, sheteldik áriptesterimizdi habardar etkimiz keledi. Búgin, mine, mundaı kezdesý Astanada ótýde. Naýryz aıynyń sońynda Nıý-Iorkta, Londonda, Gonkongta, jalpy, 4 kezdesý uıymdastyrylatyn bolady», - dedi ol.
Onyń atap ótýinshe, «Samuryq-Qazyna» kompanııalar toby aktıvterine ınvestıtsııa jasaýdyń erekshe múmkindigi bar. Óıtkeni, qor elimizde túrli saladaǵy iri kásiporyndardyń basyn biriktirip otyr.
«Qor transformatsııasy sol aktıvterdi tartymdy jasaýǵa baǵyttalǵan. Búginde Qazaqstan men «Samuryq-Qazyna» AQ aktıvteri ótken jyldarmen salystyrǵanda ınvestıtsııa úshin eń senimdi tańdaý bolyp sanalady. Máselen, sońǵy 2 jylda Qazaqstan Dúnıejúzilik banktiń bıznes júrgizý jeńildigi boıynsha reıtınginde 190 eldiń ishinde 51-orynnan 35-orynǵa kóterildi», - dedi Shókeev.
Aıta keteıik, kezdesýge 300-ge jýyq dıplomatııalyq korpýs, halyqaralyq kompanııalar ókilderi qatysýda. Olarǵa qordyń strategııasy, transformatsııa baǵdarlamasy, aktıvterdi jekeshelendirý baǵdarlamasynyń aralyq nátıjeleri, sonymen qatar damýshy salalardaǵy jobalary tanystyrylýda.
