«Samuryq - Qazyna» halyq ómirin jaqsartýǵa baǵyttalǵan jobalardyń ekinshi paketin jarııalady
Memleket basshysy bıyl Qazaqstan halqyna Joldaýynda «Samuryq-Qazyna» qorynyń ekonomıkanyń basty salalaryna baqylaý jasaýǵa ǵana jetkilikti yqpaly bar majorıtarly ınvestorǵa aınalýy kerektigi týraly aıtqan edi.
«Qordyń basqa aktıvteri men aktsııalaryn jekeshelendirý kerek. Ony júzege asyrýǵa «Halyqtyq ІRO» tásilin de qoldanýǵa bolady. «Samuryq-Qazyna» qory jeke ınvestorlar derbes júzege asyra almaıtyn asa mańyzdy jobalarǵa ınvestor retinde qatysa alady»,- degen edi QR Prezıdenti Qasym-Jomart Toqaev.
Osy oraıda qor basshysy «Samuryq-Qazyna» jobalarynyń ekinshi paketin jarııalap otyr.
«Biz elimizde basymdyqqa ıe 16 ınvestıtsııalyq jobany usynamyz. Onyń ishinde 13-i ıaǵnı jobalardyń birinshi paketin bıyl kóktemde jarııaladyq. Onyń qataryna Almaty JEO-ny gazdandyrý, Batys Qazaqstandy sýmen jabdyqtaý, jańa gaz qubyrlary jáne temir joldar salý sııaqty bastamalar kirdi. 16 jobanyń jańa tiziminde munaı-gaz hımııasy, ulttyq elektr jelisin jańǵyrtý, bazalyq qýat kózin salý, jańartylatyn energııa kózderin damytý jobalary, 5G ınternetin tartý, jańa temirjoldar salý jáne taǵy basqa sharýalar bar», - dedi Almasadam Sátqalıev Ortalyq kommýnıkatsııalar qyzmeti alańynda ótken baspasóz máslıhatynda.
Onyń aıtýynsha, qor jobalary Qazaqstan halqynyń ómir súrý sapasyn jaqsartýǵa baǵyttalǵan.
«Jobalar uzaqmerzimdi sıpatqa ıe. Atap aıtqanda jumys oryndaryn ashý, eńbek jaǵdaılary men ekologııalyq ahýaldy jaqsartý. Sonymen qatar tirshilik úshin mańyzdy áleýmettik ınfraqurylym jáne bıznesti damytý jobalary bar», - deıdi ol.
«Samuryq-Qazyna» jobalarynyń ishinde halyq tirshiligi úshin mańyzdy bolyp esepteletin «Astrahan-Mańǵyshylaq» magıstraldy sý tartqyshyn rekonstrýktsııalaý, Kendirli kentinde teńiz sýyn tuşytý zaýytyn salý, «Maqat- Soltústik Kavkaz» lýpıngin salý, Qashaǵan ken ornynda gaz óńdeý zaýyty men Almatyda gaz ınfraqurylymyn salý jospary bar.
Sondaı-aq, Almasadam Sátqalıev qor aktsııalaryn jekeshelendirý jáne ulttyq kompanııalardy IPO-ǵa shyǵarý taqyrybyn sóz etti.
«Bıyl 1 tamyzda Qazaqstan Respýblıkasynyń ekonomıkasyn jańǵyrtý jónindegi memlekettik komıssııa básekeli ortaǵa berý úshin aktıvterdiń jańartylǵan tizbesin kelisip, bekitti. Ol boıynsha 2 tamyzda QR Úkimetiniń qaýlysy qabyldandy. Jekeshelendirý boıynsha qor aktıvteriniń sany 105-ten 254-ke deıin ulǵaıatynyn aıtqym keledi. Sol sııaqty kompanııalardy IPO-ǵa shyǵarý jumysy belsendi júrip jatyr. Atap aıtqanda, bıyl «Qazmunaıgaz» boıynsha KASE jáne AIX jergilikti bırjalarynda IPO ótkizý úshin daıyndyq jumystary belsendi júrgizilýde. Al «AirAstana» kompanııasy IPO-ǵa ótýge daıyn», - dedi qordyń basqarma tóraǵasy.
«Samuryq – Qazyna» basshysy keltirgen málimetke sáıkes, 2025 jylǵa deıin Qazmunaı, AirAstana, QazaqGaz jáne Qazaqstan temir joly kompanııasyn IPO-ǵa shyǵarý, al KEGOC kompanııasyn SPO-ǵa ótkizý josparlanyp otyr.
Qor jumysyna qatysty taǵy bir jańalyq aktsııalardy jekeshelendirý jáne IPO/SPO-ǵa ótý boıynsha resmı saıt iske qosyldy. (https://ipo.sk.kz/ipo/)
«Samuryq-Qazyna» ulttyq qory atynan jańa saıtty ashylýy týraly habarlaýǵa ruqsat etińizder. Ol jerde ınvestorlarǵa arnalǵan barlyq aqparat bar. ıAǵnı qor aktsııalaryn jekeshelendirý men IPO/SPO-ǵa qatysty tolyq aqparat alýǵa bolady», - dep jańa saıtty tanystyrdy A. Sátqalıev.
Osy oraıda IPO/SPO-ǵa ótetin kompanııalardyń «Samuryq Qazyna» qoryna tıesili aktsııa úlesine toqtalsaq.
Qor «QazMunaıGaz» ulttyq kompanııasynyń 90,4%, «AirAstana» 51%, KEGOC 90%, «Samuryq-Energo» 100%, QazaqGaz 100% jáne Qazaqstan temir joly kompanııasynyń 100% aktsııasyna ıe.
Ortalyq kommýnıkatsııalar qyzmeti alańynda ótken baspasóz máslıhatynda qor tóraǵasy Qazaqstan temir joly kompanııasynyń qaıta qurylatyny týraly aıtty.
«Qazaqstan temir joly» - elimizdiń negizgi logıstıkalyq haby. Atalǵan kompanııany qaıta qurýdaǵy maqsat - ulttyq ekonomıkanyń eksporttyq áleýetin jáne ishki qajettilikterin iske asyrý. Tranzıttik tasymaldardyń ósý qarqynyn saqtap, jańa baǵyttar sanyn arttyrý. Sondaı-aq, bizdiń aldymyzda kólik qyzmetteriniń álemdik naryǵynda básekege qabilettilikti arttyrý jáne temir jol qyzmeti salasyn tsıfrlandyrý mindeti tur. Odan bólek, servıs sapasyn jaqsarta túsip, klıentke baǵdarlaýymyz kerek», - dedi ol brıfıngte.
«Samuryq-Qazyna» basshysynyń málimdeýinshe, «Qazaqstan temir joly» kompanııasy tranzıttik-logıstıkalyq korporatsııa bolyp qaıta qurylmaq. Kompanııany qaıta jańǵyrtý arqyly onyń qarjylyq turaqtylyǵyn saqtap, fýnktsıonaly men quzyretin keńeıte túspek.
Odan bólek, Almasadam Sátqalıev QTJ-nyń qyzmet kórsetý geografııasynyń keńeıe túsetinin tilge tıek etti.
