Samuryq-Qazyna Dúnıejúzilik bankpen birge «jasyl» ekonomıkany zertteıdi

ASTANA. QazAqparat - Elordada ótip jatqan Táýelsiz ál-aýqat qorlary halyqaralyq forýmynyń (IFSWF) jyl saıynǵy 9-shy otyrysy aıasynda «Samuryq-Qazyna» AQ men Dúnıejúzilik bank arasynda yntymaqtastyq týraly aldyn ala kelisimge qol qoıyldy. Onyń maqsaty - «jasyl» damý salasynda birlesken áleýmettik-ekonomıkalyq taldaý jumysyn júrgizý, dep habarlaıdy QazAqparat.

«Bul mańyzdy oqıǵa «Samuryq-Qazyna» ulttyq ál-aýqat qory men Dúnıejúzilik bank arasynda yntymaqtastyq ornaǵanyn bildiredi. Ornyqty damý jáne belsendi ınvestıtsııalar Qor qyzmetiniń strategııalyq baǵyttary bolyp tabylady. «Jasyl» ekonomıka salasyndaǵy zertteý jumystary qaıta qalpyna keletin qýat kózderin paıdalanýǵa baǵyttalǵan jobalardy yntalandyrýǵa óz úlesimizdi qosýǵa jol ashady. Al ıslamdyq qarjylandyrý salasynda qazaqstandyq kompanııalarǵa ınvestıtsııalaý tetikterin keńeıtýge septigin tıgizedi», - dedi Qordyń basqarma tóraǵasy Ómirzaq Shókeev.

Kelisimge sáıkes taraptar Qazaqstanda jáne Ortalyq Azııa óńirinde «jasyl» ekonomıkany damytýǵa baǵyttalǵan birlesken ǵylymı-zertteý jobalardy júzege asyrýdy josparlap otyr. Sonymen qatar ıslamdyq qarjylandyrý salasynda, Qazaqstan jáne TMD memleketteri naryǵynda damytý múmkindikteri men syn-qaterlerdi sheshý boıynsha birlesken ǵylymı-zertteý jumystary júrgizilmek.

Dúnıejúzilik banktiń Qazaqstandaǵy turaqty ókili Frensıs Ato Braýnnyń paıymynsha, endigi ýaqytta álem «burynǵy sarynmen» jumys isteı almaıdy.

«Búginde «jasyl» damý - bul ornyqty áleýmettik-ekonomıkalyq damý maqsatynda qoǵam aldyndaǵy ekologııalyq syn-qaterlermen jumys. Dúnıejúzilik banktiń toby Qazaqstanda Birlesken ekonomıkalyq zertteýler baǵdarlamasy aıasynda óziniń jahandyq tájirıbesin jáne usynystaryn, sonymen qatar «Samuryq-Qazyna» qoryna «Qazaqstannyń jasyl ekonomıkasy» tujyrymdamasy men josparyn qoldaýǵa septigin tıgizetin aǵymdaǵy jobalardy kádege jaratady», - dedi Ato Braýn.