«Samuryq-Qazyna» demeýshilik jáne qaıyrymdylyq sharalaryn doǵarady

ASTANA. QazAqparat - «Samuryq-Qazyna» ulttyq ál-aýqat qory» AQ demeýshilik jáne qaıyrymdylyq sharalaryn doǵarady. Bul týraly búgin QR Prezıdenti janyndaǵy Ortalyq kommýnıkatsııalar qyzmetindegi brıfıngke atalǵan qordyń basqarýshy dırektory Darhan Qaletaev málim etti.

«Elimizde jáne barsha álemde bolyp jatqan qazirgi qarjylyq jaǵdaıǵa baılanysty qordyń kompanııalar toby boıynsha demeýshilik jáne qaıyrymdylyq kómektiń kólemin shekteý sheshimi shyǵaryldy. Dálirek aıtqanda, biz búginde Uly Otan soǵysy ardagerleri máseleleri men jergilikti atqarýshy organdarymen qol qoıylǵan memorandýmdar boıynsha áleýmettik baǵdarlamalardan ózge baǵyttar turǵysynda osyndaı sharalardy tolyq toqtatamyz», - dedi basqarýshy dırektor.