«Samuryq-Qazyna» bes nysandy Túrkistan oblysynyń ákimdigine tegin tapsyrdy

TÚRKІSTAN. QazAqparat – Túrkistan qalasynda aýqymdy qurylys jumysyn júrgizgen «Samuryq-Qazyna» qory áleýmettik mańyzy bar bes nysandy oblys ákimdigine tegin tapsyrdy. Jańadan salynǵan nysandardyń qatarynda H.A. ıAssaýı murajaıy men ortalyq stadıon, Oqýshylar saraıy men Kongress-holl jáne «Qazposhta» AQ oblystyq bólimshesiniń ǵımaraty bar, dep habarlaıdy QazAqparat tilshisi.

Bul nysandardyń qurylysy 2019 jyldyń qazan aıynda qor men Túrkistan oblysy ákimdigi arasyndaǵy yntymaqtastyq týraly qol qoıylǵan memorandým aıasynda bastalǵan bolatyn.

«Jyl basynan beri biz áleýmettik mańyzy bar 6 nysannyń qurylysyna kiristik. Olardyń birinshisi – amfıteatr jyl basynda paıdalanýǵa berildi, qalǵan beseýin Túrkistan oblysynyń ákimdigine aqysyz tapsyrýǵa daıynbyz. Qurylys barysynda ákimdik tarapynan aıtarlyqtaı qoldaý kórsetildi», – dedi Ahmetjan Esimov.

Óz kezeginde oblys ákimi óńirdiń gúldenýine qosqan úlesi úshin qorǵa alǵys aıtyp, Túrkistan ólkesiniń damýyna qosqan úlesi týraly jańa memorandýmǵa qol qoıdy.

«Elimizdiń Tuńǵysh Prezıdenti – Elbasy N. Nazarbaevtyń Túrkistandy jańǵyrtý jónindegi tapsyrmasy aıasynda siz basqaryp otyrǵan «Samuryq-Qazyna« Ulttyq ál-aýqat qory oblys ortalyǵyndaǵy áleýmettik mańyzy bar bes nysannyń qurylysyn sátti júzege asyrdy», - dedi oblys ákimi Ómirzaq Shókeev.

Sonymen qatar, atalǵan qor óńirde gazdandyrý, elektr energetıkasy, elektrondyq kommertsııa, poshta qyzmetteri, aqparattyq jáne kommýnıkatsııalyq ınfraqurylym salasyndaǵy birqatar jobany iske asyrýdy jalǵastyrýda. Áleýmettik salany damytýǵa jáne jergilikti halyqtyń ál-aýqatyn arttyrýǵa erekshe kóńil bólinbek.

Esterińizge sala keteıik, 2019 jyly qor Arys qalasyn qalpyna keltirýge de belsendi qatysqan bolatyn. Qor Arys qalasynda 68 áleýmettik ınfraqurylym nysanyn, onyń ishinde 16 mektep, 36 balabaqsha, 8 densaýlyq saqtaý nysany, 4 sport nysany, kolledj, Temirjol vokzaly, Dańq alleıasy men ortalyq alańdy qalpyna keltirgeni belgili.