«Samuryq-Qazyna» basshysy satyp alýlardyń tendersiz ótkizilýin túsindirdi
«Qyzmetter men taýarlardyń bir bóligin biz jergilikti naryqtan satyp alamyz. Mysaly, jergilikti Jylý elektr ortalyǵy nemese sý arnasynan alamyz jáne olardan basqa balamaly kásiporyn joq, ıaǵnı tabıǵı monopolııalar. Bul baǵyttaǵy satyp alýlar bizde 79 paıyzǵa deıin jınalady. Qalǵan satyp alýlar júz paıyz tenderler arqyly júrgiziledi. Osy máseleni osyǵan deıin birneshe márte jumys toptarynda túsindirgen edik. Atap aıtqanda, biz taǵy da qujattardy kórsetýge daıynbyz. Kóterilgen osy máseleler tabıǵı ári obektıvti sebepterge qatysty»,-dedi Shókeev QR Parlamenti palatalarynyń birlesken otrysynda depýtattardyń saýalyna jaýap berý barysynda.
Qor basshysy «QTJ» nemese «QMG» sekildi ulttyq kompanııalarda satyp alýlar ózara tendersiz ótkiziletinin, óıtkeni osyndaı qadamdar deldaldardy boldyrmaý úshin jasalatynyn, bul óz kezeginde qarjyny únemdeýge múmkindik beretinin atap ótti.
Budan bólek Shókeev kapıtaldyń tıimdiligi koeffıtsentine (ROE) toqtaldy. Bul kórsetkish kapıtalǵa qaıtarymdylyqty kórsetedi. 2012 jyly ROE 12,5 paıyzdy qurasa, qazirgi kezde 5,5 paıyzǵa teńesti.
«2012 jyly jańa menedjmentpen jumystyń birinshi jyly edi, ol kezde BTA-bank syrtqy qaryzdaryn qaıta qurylymdaýdy ótkizdi. Bul óz kezeginde Qordyń qarjylyq kórsetkishterine áser etti»,-dep toqtaldy ol.
Sonymen qatar ol 2012 jyly munaı baǵasy júz dollardy quraǵanyn, al qazir elý dollar deńgeıinde ekenin eske salyp ótti. «Ýran quny fýntyna 40 dollar bolsa, qazir 20 dollar deńgeıinde. Sondyqtan da 2012 jyl men odan keıingi merzimdi salystyrý qatelik bolar»,-dedi Qor basshysy.
