«Samuryq-Qazyna» basshysy «Qazposhta» kompanııasynyń kadrlyq saıasatyn synǵa aldy

ASTANA. QazAqparat - Búgin «Qazposhta» AQ dırektorlar keńesi, aktsıonerleri jáne qyzmetkerlerimen ótken keńeste «Samuryq-Qazyna» Ulttyq ál-aýqat Qory» AQ basqarma tóraǵasy Ómirzaq Shókeev kompanııanyń kadrlyq saıasatyn synǵa aldy.

«Sizderde ishki qurylym tym aýyrlanyp ketken: tórt orynbasar, bir qarjy dırektory, neshe túrli qyzmetterdiń top-top basshylary, 20-ǵa tarta departament. Bul ne degen sumdyq? Tipti poshta qyzmeti adamdardy jumysqa qabyldaıtyn uıymǵa aınalǵan tárizdi. Bulaı bolýǵa tıis emes! Biz transformatsııaǵa baramyz desek, onda durys kadrlyq saıasat kerek, onsyz eshteńe de shyqpaıdy», - dedi Ómirzaq Shókeev keńes barysynda.

Bul rette Qor basshysy búgingi tańda «tereńdetý jumysy bastalǵanyn», oǵan kim tússe, «kesiletinin» atap ótti. «Osyǵan baılanysty men basqarma basshysyna da dırektorlar keńesine de tolyq kart-blansh beremin. Olaı bolmasa biz eshteńe de isteı almaımyz», - dedi ol.