«Samuryq-Qazyna» «Astana» rallı-tobyna qoldaý kórsetýdi jalǵastyrady - Ó.Shókeev
ASTANA. 28 qańtar. QazAqparat - Keshe «Samuryq-Qazyna» AQ Basqarma tóraǵasy Ómirzaq Shókeev rallı-reıd boıynsha «Astana» tobynyń qatysýshylarymen kezdesti.
Bas demeýshisi «Samuryq-Qazyna» AQ bolyp tabylatyn top álemdegi eń kúrdeli «Dakar-2012» rallı-avtobáıgesinde júk mashınalarynyń jalpy esebinde 3-shi oryndy ıelendi.
Ó.Shókeev top múshelerin jeńisimen quttyqtaı kele: «aty ańyzǵa aınalǵan «Dakar» jarysynda júlde alý - bul asa joǵarǵy nátıje, sensatsııa,tańqaldyrarlyq oqıǵa. Qazaqstandyqtar topqa jankúıer bolyp, Sizderge shyn júregimen jeńis tiledi! Munda, «Samuryq-Qazyna» qorynda kóptegen adamdar sizderdiń jarystaryńyzdy qadaǵalady! Sizder muny sezingen bolarsyzdar dep oılaımyn», - dedi.
«Sporttyq jeńister naǵyz otansúıgishtikti, óz eliń úshin, otandastaryńyz úshin maqtanyshty oıatady. Sizder bul saıysta qazaqstandyqtar álemdik jetekshilermen teń dárejede kúresip qana qoımaı, sonymen qatar osy kúreste jeńe de alatynyn aıqyn kórsettińizder. Bul úlgi búgingi tańda óte mańyzdy»,- dep atap ótti Ó. Shókeev.
Óz kezeginde, «Astana» tobynyń jetekshisi Artýr Ardavıchýs qorǵa demeýshiligi úshin alǵys aıtty.
«Samuryq-Qazyna» qorynyń qoldaýy arqasynda biz jarysty laıyqty ótkizdik, halyqaralyq sport maıdanynda bizdiń eldiń namysyn qorǵaý úshin barlyq jigerimizdi saldyq»,- dedi ol.
Kezdesý barysynda Ó.Shókeev qor budan bylaı da topqa qoldaý kórsetetinin aıtyp ótti.
