«Samuryq-Qazyna» aldaǵy 2 jylda 30 aktıv pen 45 nysanyn qaıta qurylymdaýdan ótkizbek

ASTANA. QazAqparat - «Samuryq-Qazyna» ulttyq ál-aýqat qory aldaǵy 2 jyldyń ishinde 30 aktıv pen 45 nysanyn qaıta qurylymdaýdan ótkizetin bolady. Bul týraly atalǵan qordyń baspasóz qyzmeti taratqan aqparatta aıtylǵan.

«Qor enshiles kompanııalardaǵy beıindi emes aktıvter men nysandardy shyǵarý baǵdarlamasy aıasynda aıtarlyqtaı nátıjege qol jetkizdi. 2013 jyldyń sońynda 713 aktıv pen nysannyń 482-si shyǵaryldy», - delingen habarlamada.

Taratylǵan aqparatqa qaraǵanda, ótinimniń joqtyǵynan 20 aktıv pen nysanǵa jarııalanǵan konkýrstar men aýktsıondar jaramsyz dep tanylyp, olardy shyǵarý aǵymdaǵy jyldyń enshilisine qaldyrylǵan.

«Jalpy alǵanda, aldaǵy eki jyl ishinde 30 aktıv pen 45 nysan qaıta qurylymdaýdan ótetin bolady», - delingen qor aqparatynda.