«Samuryq-Qazyna» AQ táýelsiz dırektory ómirden ozdy

ASTANA. QazAqparat - 68 jasqa qaraǵan shaǵynda «Samuryq-Qazyna» qorynyń táýelsiz dırektory, dırektorlar keńesiniń múshesi Baron Olıve Dekamp dúnıeden ótti, dep habarlandy kompanııanyń saıtynda .

«Ony meıirimdilik, barlyq qyzmetkerlerge qurmetpen qaraý, kishipeıildik qasıetteri ereksheledi. Degenmen, Olıve Dekamp Qordyń strategııalyq maqsattaryna qatysty máselelerde asqan jaýapkershiliktiń, tabandylyq pen qajyrlyqtyń úlgisin kórsetti.

«Samuryq-Qazyna» qorynyń ujymy Baron Olıve Dekamptyń týǵan-týystaryna kóńil bildiredi», delingen mátinde.

Onyń jahandyq korporatıvtik qarjy jáne damýshy naryqtar salasyndaǵy joǵary býyndaǵy basshy retinde 40 jyldyq tájirıbesi bar edi. Olıve Dekamp eńbek jolyn bank salasynda Brazılııanyń Chase Manhattan Bank-inen bastap, keıin ony AQSh-ta jáne Ulybrıtanııada jalǵastyrdy. Ol 1993 jyly Eýropalyq qaıta qurý jáne damý bankiniń jańadan bekitilgen komandasyna kirdi jáne 2015 jylǵa deıin 34 memlekettegi operatsııalarǵa jaýap berip, bank strategııasy jáne saıasaty jónindegi komıtettiń múshesi boldy.

Baron Olıve Dekamp QR Úkimetiniń 2015 jylǵy 29 jeltoqsandaǵy № 1113 qaýlysymen «Samuryq-Qazyna» AQ Dırektorlary keńesiniń quramyna táýelsiz dırektor retinde taǵaıyndaldy. Ol Aýdıt jónindegi komıtettiń jáne Taǵaıyndaýlar jáne syıaqylar jónindegi komıtettiń múshesi boldy.