«Samuryq-Qazyna» AQ men «Ardagerler uıymy» RQB arasynda memorandýmǵa qol qoıyldy

ASTANA. QazAqparat - Búgin «Samuryq-Qazyna» AQ Qoǵammen baılanys qyzmetiniń bas dırektory Darhan Qaletaev pen Respýblıkalyq «Ardagerler uıymy» qoǵamdyq birlestigi Ortalyq keńesiniń tóraǵasy Ómirzaq Ozǵanbaev 2015 jyly Otan soǵysynyń 70 jyldyǵyn toılaý qarsańyndaǵy daıyndyq jumystary aıasynda Áriptestik týraly memorandýmǵa qol qoıdy.

Aıta keteıik, 2012 jyly TMD memleket basshylary Dostastyq elderinde 1941-1945 jyldardaǵy Uly Otan soǵysyndaǵy jeńistiń 70 jyldyǵyn keń aýqymda toılap, 2015 jyldy «Ardagerler jyly» dep ataýǵa sheshim qabyldaǵan bolatyn. Osyǵan baılanysty elimizde osynaý ataýly kúnge daıyndyq bastalyp ta ketti.

«Memorandýmnyń basty maqsaty - alda kele jatqan Jeńis kúnin atap ótý ǵana emes, sonymen qatar, osy jeńisti alyp kelgen qarttarymyzǵa qoldan kelgenshe kómektesý. Sondaı-aq Jeńistiń 70 jyldyǵyn óz dárejesinde toılaý úshin barlyq daıyndyq jumystary júrgizilip jatyr. «Samuryq-Qazyna» ál-aýqat qory da bul sharaǵa baryn salýda», - dep atap ótti D. Qaletaev.

«Ardagerler bar ómirin bizdiń búgingi baqytty ómir súrýimizge arnaǵan aıaýly jandar. Olardy qoldap, qorǵaý - bizdiń azamattyq paryzymyz. «Samuryq-Qazyna» qorynyń ardagerlerimizge osyndaı qamqorlyq kórsetip otyrǵany úlken azamattyq. Búgingi qol qoıǵan qujatymyz Elbasy Nursultan Nazarbaevtyń ardagerlerdi qoldaýǵa baılanysty saıasatynyń bir baǵyty dep bilemiz», - dep atap ótti Ó. Ozǵanbaev.

Aıta keteıik, «Ardagerler uıymy» RQB elimizdegi eń keń taralǵan uıymdardyń biri. Onyń quramynda shamamen 1,7 mln. adam bar. Búginde elimizdegi kózi tiri 6300-den astam soǵys ardageri men 203 270 tyl eńbekkerleri, sondaı-aq 744 kontslagerler tutqyndary osy uıymnyń músheliginde.