«Samuryq-Qazyna» AQ birinshi jartyjyldyq qorytyndysy boıynsha 19,6 mlrd. teńgege jýyq qarjy únemdedi
«Birinshi jartyjyldyq qorytyndysy boıynsha «Samuryq-Qazyna» AQ kompanııalar toby elektrondy satyp alý júıesin iske qosyp, qazynashylyq operatsııalar júıesin ilki joba retinde engizdi. Sol arqyly «Samuryq-Qazyna» AQ 19,6 mlrd. teńgege jýyq qarjy únemdedi. 2013 jyly 14 tamyzda Astana qalasynda Qor Basqarmasynyń keńeıtilgen otyrysynda osyndaı málimetter jarııalandy. Otyrysqa «Samuryq-Qazyna» AQ basshysy Ómirzaq Shókeev jetekshilik etti», - delinedi habarlamada.
Májiliste Elektrondy satyp alýdyń aqparattyq júıesin (ESAJ) engizý jobasyna qatysty bastapqy nátıjeler usynyldy. Shara barysynda ESAJ engizilgeli beri, ıaǵnı, 2013 jyldyń 31 qańtarynan bastap, Qor qaramaǵyndaǵy kompanııalardyń tolyqtaı elektrondy satyp alýǵa kóshkeni aıtyldy.
Sonymen qatar, Basqarma otyrysynda «Samuryq-Qazyna» AQ Qazynalyq qyzmetiniń, Qor men birqatar enshiles kompanııalarda («Qazmunaıgaz» UK» AQ, «Qazposhta» AQ, «QTJ» UK» AQ, «Samuryq-Energo» AQ) qazynalyq operatsııalardy basqarý úlgisin engizýdiń ilki jobasy týraly esebi tyńdaldy. Bul joba qarjyny tıimdi paıdalanýǵa, qaryz júktemesin azaıtýǵa, Qor qaramaǵyndaǵy kompanııalardyń tabysy men qunyn kóterýge baǵyttalǵan.
Atalǵan jumys ótken jyldan beri qolǵa alynǵan jáne aǵymdaǵy shottaǵy qarjy mólsherin azaıtyp, olardyń depozıttegi kólemin ulǵaıtý, valıýtany satý/satyp alý operatsııasyn ortalyqtandyrý, Qordaǵy kompanııalar tobynyń banktik tarıfterin tómendetip, birizdendirý arqyly 15 mlrd. teńge únemdeldi. Jobany 2013 jyldyń aıaǵy men 2014 jyldyń basynda «Samuryq-Qazyna» AQ-nyń barlyq enshiles kompanııalaryna engizý kózdelip otyr.
Qor basshylyǵy atalǵan jobalardy júzege asyrý nátıjesinde únemdeletin qarjy kólemi arta túsedi jáne bul bolashaqta Qor tobynyń qarjylyq pozıtsııasyn kúsheıtýge múmkindik beredi dep esepteıdi. Mysaly, elektrondy satyp alý júıesi engizilgennen keıin jyl saıyn únemdeletin qarjy kólemi 20 paıyzǵa deıin jetpek.
Sondaı-aq, Basqarma Memleket basshysy joldaýyndaǵy «Qazaqstan-2050» Strategııasy aıasynda «Samuryq-Qazyna» AQ Kompanııalar tobyna sheteldik mamandardy tartý máselesin qarady.
Atap aıtsaq, bul jerde ІT, telekommýnıkatsııalar men baılanys, hımııa, kólik-logıstıka, elektr energetıka, «jasyl» ekonomıka, Taý-metallýrgııa kesheni salasyna, adamı resýrstardy basqarý, qarjylyq baqylaý jáne táýekelder men ózgeristerdi basqarý salalaryna jetekshi retinde shetelden mamandar shaqyrý týraly áńgime bolyp otyr.
Qazirgi tańda úmitkerlerge qoıylatyn biliktilik talaptar bekitilgen. Qorǵa laıyqty maman izdeýge álemdegi iri rekrýtıngtik kompanııalar arasynan iriktep alynǵan seriktester kómektesedi. Jıynda belgili bolǵandaı, bul jumysta negizinen «Samuryq-Qazyna» AQ Kompanııalar tobyna jetekshilik qyzmetterge álemniń úzdik kompanııalarynda tájirıbe jınaqtaǵan qazaqstandyq top-menedjerlerdi kóptep tartýǵa kóńil bólinbek.
