«Samuryq-Qazyna» 2016 jyly 730 mlrd. teńge paıda tapty

ASTANA. QazAqparat - «Samuryq-Qazyna» UÁQ kompanııalar tobynyń 2016 jylǵy tabysy 730 mlrd. teńgeni qurady. Bul jaıynda Ortalyq kommýnıkatsııalar qyzmetindegi brıfıngte Qordyń qarjy jáne operatsııalar jónindegi ýaqytsha basqarýshy dırektory Ernar Janádil málim etti, dep habarlaıdy QazAqparat.

«Samuryq-Qazyna» AQ 2016 jyldy ońtaıly qarjylyq nátıjemen aıaqtady. Aktsıoner úlesindegi shoǵyrlanǵan taza paıda 2016 jyldyń qorytyndysy boıynsha 455 mlrd teńgeni qurady. Bul 2015 jylǵy kórsetkishten 180 paıyzǵa nemese 292 mlrd teńgege artyq», - dedi ol

Qor málimetinshe, shoǵyrlanǵan túsim sommasy 4,1 trln teńgege jýyq. Bul ótken jyldyń kórsetkishterine qaraǵanda 32 paıyzǵa joǵary.  Qor tobynyń shoǵyrlanǵan túsimi 730 mlrd. teńge boldy. Bul da 2015 jylǵy kórsetkishten 345 mlrd. teńgege artyq. Jalpy ákimshilik  shyǵystar 345 mlrd. teńgeni qurady. Bul 2015 jyldyń kórsetkishterimen salystyrǵan 36 mlrd. teńgege kem.  Ótken jyly bıýdjetke shamamen 610 mlrd. teńge salyq tólendi.

«2015 jyly munaıdyń ortasha baǵasy barreline 52 dollar, al 2016 jyly 44 dollar boldy. ıAǵnı, biz teris áser alamyz dep kútken edik. Biraq, oń nátıje oryn aldy. Bul 2016 jyldyń ekinshi jartyjyldyǵynda munaı baǵasy kóterilip, mol munaı satylyp, túsim joǵary boldy»,  - dedi Ernar Janádil.