«Samuryq-Energonyń» birinshi toqsandaǵy kirisi 73,6 mlrd teńgeden asty
ASTANA. QazAqparat - 2018 jyldyń І toqsanynyń qorytyndysy boıynsha, «Samuryq-Energo» AQ-nyń operatsııalyq tabysy 17,7 mlrd teńgege deıin ulǵaıdy, dep habarlaıdy QazAqparat kompanııanyń baspasóz qyzmetine silteme jasap.
Baspasóz málimetterine qaraǵanda, bul byltyrǵy jyldyń tap osyndaı kórsetkishinen 33% joǵary. Esepti kezeń ishinde EBITDA 29,7 mlrd teńgeni qurady, ıaǵnı ósim - 20% nemese 4,9 mlrd teńge. Jedel málimet boıynsha qoryta alynǵan tabys 13,4 mlrd teńge shamasynda baǵalandy.
Samuryq-Energonyń qarjylyq kórsetkishteriniń jaqsarýyna óndiristik qýat kózderin ońtaıly júkteý, óndiris kólemin ulǵaıtý jáne elektr energııasyn satý, sonyń ishinde eksportqa shyǵarý arqyly qol jetkizildi.
Bıylǵy jyldyń qańtar-naýryzyndaǵy kiris 73,6 mlrd teńgeden asty. Bul rette energııa óndiretin jetekshi kásiporyndar - EGRES-1 men EGRES-2 elektr energııasyn belgilengen shekti tarıften tómen baǵamen satyp jatqandyǵyn aıta ketý kerek.
Esepti kezeń ishinde 9 mlrd kVtsaǵ elektr energııasyn óndirý qamtamasyz etildi, bul byltyrǵy jyldyń deńgeıinen 23% joǵary. RF-ǵa eksporttaý kólemi 84% ulǵaıyp, 1,627 mlrd kVtsaǵatty qurady. Kómir óndirý 11,7 mln tonnaǵa jetti, bul 2017 jyldyń dál osyndaı kezeńinen 16% joǵary. Jylý energııasyn óndirý men satý kólemi josparly kórsetkishter sheginde qaldy.
«Samuryq-Energo» AQ asa iri elektr-energetıkalyq holdıng bolyp tabylady, onyń aktsııalary «Samuryq-Qazyna» UÁQ» AQ-ǵa 100% tıesili. Elektr stansylarynyń belgilengen qýaty 6,8 gıgavatty nemese BEJ-diń jıyntyq qýatynyń 31% quraıdy.
2017 jyldyń qorytyndysy boıynsha barlyǵy 28,6 mlrd kVtsaǵ óndirilip, Samuryq-Energonyń elektr energııasyn óndirý sektoryndaǵy úlesi 24-ten 28% artty. Top quramyndaǵy kompanııalar byltyr Qazaqstanda jasyl elektr energııasynyń árbir úshinshi kVtsaǵ-nyń óndirilýin qamtamasyz etti.
