Samuryq-Energo ókili «Bogatyr Kómir» ken ornyndaǵy qaıǵyly oqıǵanyń mán-jaıyn aıtty
«Kompanııada bolǵan 4 qaıǵyly oqıǵanyń árqaısysynyń sebebi qandaı?» dep surady «Samuryq-Qazyna» AQ qoǵamdyq keńes tóraǵasy Bolat Jámishev.
Tólegen Maksılovtyń aıtýynsha, zańnama talaptary kásiporynǵa jumysshylardyń psıhıologııalyq jaǵdaıyn baqylap otyrýǵa múmkindik bermeıtin kórinedi.
«Shynymen de ár oqıǵa óte qaıǵyly jaıt bolyp otyr. Áriptesteri 1-2 kún qaıǵyryp umytyp ketkenimen, otbasy úshin orny tolmas qasiret. Ár oqıǵany búge-shigesine deıin taldap, zerttedik. Resmı tergeýden bólek ózimizdiń ishki tergeý júrgizildi. «Bogatyr Kómirde» brıgadır vagon astyna túsip ólgen jaǵdaıdy qarasaq, qaıǵyly jaıtqa eshqandaı alǵyshart joq bolatyn. Ózi brıgadır, eńbek qaýipsizdigin ózgelerge úıretip júretin. Bizge dırektorlar keńesindegiler jumysshylardyń psıhologııalyq jaǵdaıyna nazar aýdarýdy usyndy», - dedi ol.
Aıtýynsha, qoldanystaǵy zańnama kásiporynǵa ondaı tekserý júrgizýge ruqsat bermeıdi.
«Biraq ishki tergeý kezinde vagon astyna túsip ólgen marqum eki aptadan keıin demalysqa shyǵýy kerek bolǵan. Búkil otbasy Astanada edi. Basynda qandaı oı bolǵanyn, jaqyndap qalǵan poıyz daýsyn nege estimegenin bilmeımin. Qasynda belgi berýshi turǵan. Ol da eskertýi kerek bolatyn. Ázirge onyń bári jumbaq kúıinde qalyp otyr. Tergeý áli aıaqtalǵan joq. Biz jasaǵan qorytyndynyń biri – baqylaýdy kúsheıtý, baqylaýshylardy oqytý. Onyń bári men joǵaryda ataǵan jobanyń aıasynda iske asady. Oǵan 80 mlrd teńge qarastyrylǵanyn aıttym. Osy keshendi ózgeristerden keıin mundaı jaıttar qaıtalanbaıdy dep úmittenemin», - dedi Tólegen Maksılov.
