«Samuryq- 2019»: Astanada qysqy rallı-sprıntten Qazaqstan kýbogy bastaldy
ASTANA. QazAqparat - Astanada muzdaǵy rallı-sprıntten el kýbogynyń birinshi kezeńi bastaldy, dep habarlaıdy QazAqparat tilshisi.
Osymen 12 jyl qatarynan uıymdastyrylyp kele jatqan avtosport jarysyna elimizdiń barlyq óńirinen 41 sportshy qatysýda. Olardyń ishinde kásipqoı sportshylarmen qatar áýesqoılar da bar.
Erejege sáıkes, avtokólikterdi «artqy jetek», «tolyq jetek» jáne «aldyńǵy jetek» boıynsha júrgizý sanattary bar.
«Bizdiń maqsat - Qazaqstanda avtosport túrin damytý. Rallı-sprınt alǵash ret 2007 jyly uıymdastyrylyp, búgin mine 12-shi ret ótip jatyr. Jarysqa kásipqoılar men áýesqoılar qatysyp jatqandyqtan, ózindik erekshelikteri bar. Áýesqoılarǵa arnalǵan jarysqa jasy 15-ke tolǵan (ata-anasynyń ruqsaty bolýy tıis) jetkinshekten bastap kez kelgen adam qatysa alady. Qatysýshyǵa arnaıy nómir berilip, ereje túsindiriledi. Biraq qatysýshy óz avtokóligimen kelýi tıis. Al kásipqoılar qatysatyn kategorııa «ICE-PRO» dep atalady olarǵa talap bólek. Odan jeńimpaz atanǵandar elimizdiń atynan halyqaralyq jarystarǵa joldama alady. Al jarystyń ózine kelsek, ol arnaıy 12 ýchaskeden turady jáne onyń barysynda qatysýshylar 60 shaqyrym qashyqtyqty baǵyndyrady», - dedi shara uıymdastyrýshysy Denıs Aksenov.
Onyń aıtýynsha, jyl sanap qatysýshylardyń sany artyp keledi. Keler jyly atalǵan sport túrinen Qazaqstan chempıonatyn uıymdastyrý josparda bar.
Bıylǵy rallı-sprınt 4 kezeńnen turady, búgin Astanadan bastaý alǵan básekeniń ekinshi kezeńi - 25-26 qańtar aralyǵynda Qaraǵandyda, úshinshi kezeńi 8-9 aqpan kúnderi Pavlodarda jáne fınal 22-23 aqpanda Astanada ótedi.
