Samuryq-Qazyna Úkimetke tóleıtin mindetti dıvıdenttiń mólsheri ózgerýi múmkin

ASTANA. KAZINFORM — Premer-mınıstr Oljas Bektenov «Samuryq-Qazyna» ulttyq ál-aýqat qory» aktsıonerlik qoǵamynyń dıvıdendtik saıasatyn aıqyndaý týraly» Úkimet qaýlysynyń jańa redaktsııasyna qol qoıdy. 

Qaýlyǵa engizilgen ózgeris qujattan 9 jáne 11 tarmaqtardyń kúshin joıǵan. Osyndaǵy 9-tarmaqta «Esepti jyldyń qorytyndylary boıynsha jalǵyz aktsıonerge tólenetin jyl saıynǵy dıvıdendterdiń eń tómengi mólsheri 25 (jıyrma bes) mıllıard teńgeni quraıdy» dep jazylǵan bolatyn. Jańa redaktsııada osy tarmaq alynyp tastalǵan. Osylaısha «Samuryq-Qazynanyń» Úkimetke jyl saıyn aýdaratyn dıvıdentiniń eń tómengi mólsheri degen uǵym joıylyp otyr.

— Qordyń dırektorlar keńesi jalǵyz aktsıonerge (Úkimetke — red.) qordyń shoǵyrlandyrylǵan taza kirisin bólý tártibi jáne qordyń bir jaı aktsııasyna eseptelgen dıvıdend mólsheri týraly usynys beredi, — dep jazylǵan qaýlynyń 7-tarmaǵynda.

Sondaı-aq, qaýlydaǵy 8-tarmaq ózgerissiz qalyp otyr. Demek, «Samyuryq-Qazynanyń» Úkimetke jyl saıyn aýdaratyn dıvıdendter qorda aktsııalaryn saqtap otyrǵan zańdy tulǵalardan esepti kezeńde alynǵan dıvıdendterdiń 50 paıyzynan kem bolmaý kerek. Biraq bul jerde «Samuryq-Qazyna» arqyly Ulttyq qorǵa jiberilgen dıvıdentterdiń mólsheri esepke alynbaıtyny naqtylanǵan.

Eske salsaq, buǵan deıin Joǵary aýdıtorlyq palata múshesi Nurlan Nurjanov «Samuryq-Qazyna» aktsıonerlik qoǵamynyń bıýdjetke dıvıdent tóleý saıasatyndaǵy quıtyrqy shemalardy ataǵan bolatyn. 

— Kvazımemlekettik sektor bıýdjetke dıvıdentter retinde 980 mlrd teńge aýdarǵan. Bul 2023 jylmen salystyrǵanda 23 paıyz tómen. «Samuryq-Qazyna» aktsıonerlik qoǵamyna júrgizip jatqan aýdıttiń aldyn ala málimetteri boıynsha qordan jyl saıyn tólenetin dıvıdenttiń mólsheri júıe quraýshy kompanııalardan ǵana alynatynyn kórsetti. Sońǵy 5 jylda qor júıe quraýshylar tizbesine engizilmegen kompanııalardan dıvıdent retinde 347 mlrd teńge alǵan. Biraq ol dıvıdentter bıýdjettiń bólinisinen tys qalǵan, — degen edi.

Aıta ketelik Joǵary aýdıtorlyq palata múshesi Nurlan Nurjanov «Samuryq-Qazyna» bıýdjetke tıesili dıvıdentterdi tolyq tólemeı otyr degen edi.